Сунтаар оҕуруотчуттара агроэкскурсияҕа кытыннылар

221

Субуота күн Сунтаарга олус сэргэх, сонун тэрээһин буолла. Улууспутугар аан бастакытын оптуобуһунан агроэкскурсия ыытылынна. Бу тэрээһини дьиҥ олоххо киллэрбит киһинэн математика учуутала үөрэхтээх, бу иннинэ хас да сыл улуустааҕы үөрэҕирии салаатыгар уонна улуус дьаһалтатыгар сүрүннүүр исписэлииһинэн үлэлээбит Василий Николаевич Хаптасов буолар.


Агротуур сүрүн сыала-соруга диэн бэйэлэрин тэлгэһэлэригэр, хаһаайыстыбаларыгар араас оҕуруот, сир аһын үүннэриинэн дьарыктанар биир интэриэстээх дьону түмүү буолар. Бастакы холонуу диэтэххэ, тэрээһин соругун ситтэ.

Экскурсияҕа барыта 37 киһи кытынна. Мин өйдүүрбүнэн, маннык тэрээһин өрөспүүбүлүкэҕэ ыытылла илик буолуохтаах. Бүлүү эҥээр улуустарга да эмиэ. Ол да иһин агротуурга сунтаардар эрэ буолбакка өссө Ньурба, Бүлүү улуустарыттан дэлэгээссийэлэр кэлэн кытыннылар. Ону таһынан Тойбохойтон, Кутанаттан бааллар.

Улууспут киинигэр үгүс дьиэ кэргэн оҕуруот аһын үүннэрэр буолуохтаах. Оттон сорох ыал оҕуруот аһын арааһын олордууну таһынан, сир аһын эмиэ үүннэрэллэр. Өссө кинилэр тиэргэннэрин киэргэтэн тупсаҕай көрүҥнүүллэр. Биһиги оннук дьаһанан олорор биэс ыалга сырыттыбыт: Андреевтарга, Поповтарга, Хаптасовтарга, Саввиновтарга уонна Папанин учаастагар аймахтарын, сиэннэрин кытта олорор 80-чалаах Лариса Ефимовна Ивановаҕа.

Кинилэр бары оҕуруот аһын, сибэкки, үүнээйи арааһын хото олордоллор. Көрөллөрө-харайаллара эмиэ тус-туһунан. Сорохтор туһунан ньымалардаахтар. Ол курдук В.Н.Хаптасов үүнээйилэрин олордоругар Кизима технологиятын уонна гидропониканы туһанар. Хортуоскатын буолатын отунан тэлгиирин үгүспүт сөҕө көрдө. Итинник гыннахха сыыс от үүммэт диир.

Киэһэтин агротуур кыттыылаахтара Сунтаардааҕы технологическай колледж аактабай саалатыгар саха эстрадатын сулустара Ирена Файрушина, Эрчим уонна олохтоох мэлэдьиистэр Афанасий Никифоров, Валерий Коротов кыттыылаах олус үчүгэй, иһирэх кэнсиэри көрдүлэр. Түмүгэр «Татыйык» кафеҕа мустан бэйэлэрин санааларын үллэһиннилэр.

Инникитин маннык агроэкскурсия Сунтаар нэһилиэгэр от, атырдьах ыйдарыгар хас субуота, өрөбүл аайы ыытыллыаҕа диэн быһаарыы ылыннылар.