Сунтаарга норуот тыйаатырын үйэтитэн саҥа кинигэ таһаардылар

758

Владимир Николаев аатынан норуот тыйаатыра 55 сыллаах үбүлүөйүгэр аналлаах 600 сирэйдээх дьоһун кинигэ сүрэхтэниитэ буолла. Кинигэҕэ бу сыллар усталаах-туораларыгар тыйаатырга ыытыллыбыт үлэ-хамнас туһунан докумуоннар, урукку сылларга үлэлээбит артыыстар, режиссердар ахтыылара, хаартыскалара киирбиттэрэ көрүөхтэн эриэккэс.


Тэрээһиҥҥэ тыйаатыры кытары өр сылларга алтыспыт, кинигэ күн сирин көрөрүгэр үлэлэспит дьон муһуннулар, уруккуну-хойуккуну ахтыстылар. Кинигэ тахсарыгар ис сүрэхтэриттэн кыһаллан-мүһэллэн үлэлээбит ааптардар Дина Николаева, Светлана Яковлева, тыйаатыр режиссера Татьяна Заровняева көмө-тирэх буолбут үтүө санаалаах дьоҥҥо, чуолаан Владимир Николаев кыыһыгар А.В.Антоноваҕа, кини дьиэ кэргэнигэр, улуустааҕы архыып дириэктэрэ Аркадий Яковлевка, култуура уонна духуобунай сайдыы управлениетын начаалынньыгар Мария Кобельяноваҕа истиҥ махталларын тиэртилэр.

«Дьону булар, ахтыы хомуйар сүрдээх ыарахан, сылаалаах үлэ эбит… Ким эрэ хаартыска биэрэн баран, ахтыытын биэрбэт. Оттон ким эрэ икки-үс этиилээх ахтыы аҕалар. Аны, тыйаатырга бастаан үлэлээбит дьону билбэппит эмиэ ыарахаттары үөскэтэ сырытта. Манна, биһиэхэ, Түбэй Дьаархантан 86 саастаах Иван Ильич Иванов улаханнык көмөлөспүтэ», – диэн ааптардар кэпсээтилэр, мустубут ыалдьыттары кытта санааларын үллэһиннилэр.

Долгутуулаах тэрээһиҥҥэ мустубут ыалдьыттар үөрэн-көтөн туран, элбэх дьону түмпүт тыйаатыр өссө сайдан, саҥа талааннары арыйан иһэригэр баҕардылар. Бу сырдык санааҕа кыттыһан туран, биһиги манна сылтан сыл саҥаттан саҥа испэктээкиллэри туруоран, кэллэктиип көрөөччүлэр биһирэбиллэрин ыла турарыгар баҕара хаалабыт.