Ааспыт бэнидиэнньиктэн Сунтаардааҕы технологическай колледж базатыгар оскуола үрдүкү кылааһын оҕолоругар аналлаах «Я – будущий предприниматель» диэн күнүскү лааҕыр үлэтин саҕалаата. Улуус оскуолаларыттан 7-тэн 10-нус кылааска диэри үөрэнэр 20 оҕо сылдьар.
Бу лааҕыр биирдэм предприниматель Надежда Львова бырайыагынан, быйылгыттан үлэтин саҕалаата. Тэрийээччилэринэн «Деловая Россия» Саха сиринээҕи салаата, «Юность Якутии» уопсастыбаннай түмсүү, Сунтаар улууһун дьаһалтата уонна «Львова Н.Г.» ИП буолаллар.
Лааҕыр үрдүкү кылаас оҕолоругар «предприниматель буолуу, бизнеһи тэринии» курдук тиэмэлэринэн үөрэтиэ. Инникитин идэлэрин талалларыгар көмөлөһөр сыаллаах бу ураты лааҕыр арыллыбытын тэрийээччилэр эттилэр.
Лааҕыр үлэлиир кэмигэр оҕолор анал куурустары, сэминээрдэри истиэхтэрэ, биллэр, таһаарыылаах үлэлээх урбаанньыттары, уопсастыбаннай диэйэтэллэри кытары көрсүһүөхтэрэ. Ону сэргэ айылҕаҕа тахсан сынньаныахтара, өйү-санааны сайыннарар уонна араас спортивнай оонньууларга кыттыахтара.
Лааҕыры аһыы үөрүүлээх тэрээһинигэр мустубут дьону, оҕолору эҕэрдэлээн улуус баһылыгын экэнэмиичэскэй сайдыыга уонна стратегическай былааннааһыҥҥа солбуйааччы М.М.Прокопьев, «Деловая Россия» Саха сиринээҕи салаатын сэбиэтин чилиэнэ, «Юность Якутии» уопсастыбаннай түмсүү бэрэссэдээтэлэ, «Успех» үөрэтэр киин дириэктэрэ Е.Н.Романова уонна «Деловая Россия» Саха сиринээҕи салаатын чилиэнэ, Сунтаар улууһугар баар «Корона» маҕаһыыннар ситимнэрин дириэктэрэ Н.Г.Львова, “БИЗНЕС-КИИНЭ” МАУ салайааччыта М.В. Саввинова тыл эттилэр.