Дьокуускай куоракка олунньу саҕаланыыта СӨ Тыатын хаһаайыстыбатын уонна аска-үөлгэ министиэристибэтин сири оҥорууга, мелиорацияҕа уонна материальнай-техническэй хааччыйыы департамена уонна Сунтаар улууһун салалтата сүбэ мунньах ыыттылар. Сүрүннээн цеолиты туһалаахтык туттарга кэпсэттилэр.
Департамент салайааччыта Василий Чичигинаров тыа хаһаайыстыбатын салаатыгар цеолит наадатын уонна ону сөптөөхтүк салайан туһаҕа таһаарыы туһунан мунньаҕар учуонайдар кыттыыны ыллылар.
Министиэристибэ информационнай сүбэ-ама биэрэр киинин үлэһитэ Дмитрий Филиппов, Дьокуускайдааҕы тыа хаһаайыстыбатын научнай-чинчийэр институтун (салгыы ДьТХНЧИ) сүрүннүүр исписэлииһэ Мария Сидорова элбэх иһитиннэрии оҥордулар.
Мария Сидорова цеолиты үүнээйини үүннэриигэ туһанар туһунан былырыыҥҥыттан былааҥҥа баарын, онон сайын «Элгээйи» кэпэрэтиибигэр үлэ ыытыллыахтааҕын эттэ. «Билигин онно анаан үп боппуруоһа быһаарыллар. Бу эппиэттээх үлэҕэ ДьТХНЧИ учуонайдара үлэлэһэргэ бэлэммит«, — диэтэ кини.
Департамент салайааччыта Василий Чичигинаров Элгээйигэ былааннанар үлэҕэ институт учуонайдарыгар көрүллүөхтээх үп барыта быһаарыллыбытын иһитиннэрдэ. «Маны таһынан учуонайдары кытта (доцент Наталия Черноградская) бу саас “Кириэстээх” кэпэрэтиибэ (дириэктэр В.С. Егоров) цеолиты сүөһүгэ сиэтиини сөргүтэр былааннаахтарын эппиттэрэ«, — диэн кэпсээтэ.
Мунньахха “Сунтарцеолит” тэрилтэ Бүлүү бөлөх улуустарыгар цеолиты тарҕатан, бэйэтин үлэтин күүһүрдэригэр этилиннэ. Онно дириэктэр Петр Попов цеолиты чугас сытар улуустарга бэйэлэрин тырааныспардарынан таһыахтарын сөбүн туһунан иһитиннэрдэ.
Мунньахха Сунтаартан улуус баһылыгын 1-кы солбуйааччы Николай Александров, “Сунтарцеолит” тэрилтэ дириэктэрэ Петр Попов уонна тэрилтэ менеджерэ Петр Егоров кытыннылар.