Тааттаҕа «Байааным тыаһа дуораһый» республикатааҕы күрэх түмүктэннэ

441

Таатта улууһугар баянистарга аналлаах иккис төгүлүн ыытыллар өрөспүүбүлүкэтээҕи Слепцов (Чупров) Николай Романович аатынан куонкуруска Ньурба, Мэҥэ-Хаҥалас, Чурапчы, Таатта улуустарыттан уонна Дьокуускай куораттан элбэх айар талааннаахтар кытыннылар. Кэлбит баянистар бииртэн-биир байаан кэрэ доҕуһуолун толорон, дьон-сэргэ биһирэбилин ыллылар.


Куонкурус сарсыардаттан киэһээҥи диэри дьон-сэргэ дуоһуйуор диэри ыытылынна. Кыттааччылар бука бары үчүгэйдик, улахан болҕомто ууран бэлэмнэммитэр.

Николай Слепцов кэриэһигэр анаммыт тэрээһиҥҥэ үгүс киһи истиҥ ахтыылары оҥорон, оҕолорун, сиэннэрин, чугас дьонун, аймахтарын долгуттулар. Кырдьык даҕаны үтүө киһи күн сиригэр кылгастык уонна чаҕылхайдык олорон ааспыта өссө төгүл дакаастаммытыттан тустаахтар киэн тутуннулар.

Николай Романович чахчы айылҕаттан дэгиттэр талааннаах аҕыс кырыылаах киһи этэ. Оҕону кытта оҕо, эдэри кытта эдэр, кырдьаҕаһы кытта кырдьаҕас буолан барыларын кытта уопсай тылы кэбэҕэстик булара. Олоҕун оҕолоро, отуттан тахса сиэннэрэ, уонтан тахса хос сиэннэрэ салгыыллар. Бары ырыа, музыка, үҥкүү эйгэтигэр талааннара аһыллыбыт, олохторун аргыһа оҥостубут бэртээхэй дьон.

Бу тэрээһин аҕатын аатын сүкпүт уола Николай Николаевич Слепцов дьиэ кэргэнин көҕүлээһининэн уонна Ф.С.Аргунов аатынан оҕо искусствотын оскуолатын үлэһиттэрин Александр Иванович Павлов, Дария Александровна Попова салайыыларынан үрдүк таһымнаахтык ааста.

Куонкурус түмүгэ маннык буолла: оҕолорго 1-кы истиэпэннээх дипломант үрдүк аатын сүктэ Айаал Иванов (Таатта), 2-һи Дима Неустроев (Амма, Алтан), 3-һү Дьулустаан Васильев (Чурапчы, Дириҥ) ыллылар. Лауреат үрдүк аатын сүктүлэр: 1-кы истиэпэннээх Эрик Самыров (Таатта), 2-с Федот Павлов (Таатта), 3-с Аркадий Гаврильев. Куонкурус анал ааттарын ыллылар Амма Алтаныттан Анисий Адамов уонна Тааттаттан Иван Бакрамов.

Гран-При аатын үөрэ-көтө, чахчы талааннаах Тааттатааҕы оҕо искусствотын оскуолатын үөрэнээччитэ Костя Давыдов сүктэ. Учуутала А.И.Павлов оҕо эрдэҕиттэн бу оскуолаҕа үөрэнэн, музыкальнай оскуоланы бүтэриэҕиттэн үлэлии сылдьар.

Айылҕаттан бэриллибит дьоҕурдарынан дьон-сэргэ дууһатын байаан тыаһынан үөрдээччилэр ортолоругар 1-кы истиэпэннээх дипломант Спиридон Готовцев (Чурапчы), 2-с Петр Туласынов (Таатта, Чөркөөх), 3-с Владимир Михайлов (Таатта, Чычымах). Лауреаттарынан буоллулар: 1-кы истиэпэннээх Василий Неустроев (Амма, Алтан), 2-с Владимир Кузьмин (Мэҥэ Хаҥалас), 3-с Ирина Попова (Чурапчы).

Анал ааттарга «Музыкаҕа бэриниитин иһин» Конон Беляев (Чурапчы, Арыылаах), «Кыайыыга дьулуурун иһин» Эдуард Тарабукин (Таатта, Чычымах), «Ытык кырдьаҕас» Степан Татаринов (Таатта), «Көрөөччүлэр биһирэбиллэрэ» Клавдия Егорова (Таатта, Игидэй), анал бириистэри ыллылар Юристан Михайлов уонна Егор Щукин.

Анал музыкальнай үөрэхтээхтэргэ 1-кы истиэпэннээх Михаил Колодезников (Мэҥэ Хаҥалас, Табаҕа), 2-с Зоя Корнилова (Амма улууһа), 3-с Прокопий Тарабукин (Чурапчы, Дириҥ) буоллулар. Лауреаттар: 1-кы Петр Башарин (Таатта), 2-с Ньургустаана Константиновна (Ньурба), 3-с Валерий Бубякин (Хаҥалас, Нөмүгү).
Сергей Винокуров (Таатта) «Музыканы уһулуччу истэр дьоҕурдаах», Эдуард Колодезников «Уһулуччу дьоҕурдаах» ааттары ыллылар.

Улахан дьоҥҥо Гран-При үрдүк аата анал убаһа бириистээх бэрилиннэ Дьокуускайтан сылдьар Андрей Псарёвка.

«Аҕабыт Николай Романович 1948 сыл кулун тутар 23 күнүгэр Кулаадаҕа төрөөбүтэ. Оҕо эрдэҕиттэн кэрэни кэрэхсиир сыыдам, быһый, түргэн, ыраас туттунуулаах, үлэһит, уруһуйдьут, мас ууһа, тутааччы буолар дьоҕура сайдан, олоҕун тухары ити барыта кинини үтүөҕэ тиэрдибитэ, оҕолоругар кытта сыстыбыта. 1968 с. айылҕаттан ураты дьоҕурдаах эдэр дьон ыал буолан биһиэхэ күн сирин көрдөрбүттэрэ. Дьиэни-уоту, үлэни таһынан кулуупка түүнэри сылдьан араас үлэлэргэ кыттара. Олус аһыныгас буолан, ийэбит балыстарын улаатыннарбыта, бэйэтин оҕолорун кытта тэҥҥэ тутан үөрэхтээх үлэһит дьон оҥорбутугар ийэбит аҕабытыгар махтала муҥура суох«, — диэн кыыһа Мария Туласынова санаатын үллэстэр.

Бу тэрээһини ис сүрэҕиттэн кыһаллан ыытыспыт, байааҥҥа Николай Слепцову кытта элбэхтик алтыспыт ытык киһи, СӨ култууратын үтүөлээх үлэһитэ, самодеятельнай композитор К.И.Христофоров: «Бу тэрээһини талааннаах байаныыс Николай Слепцов кыра уола Николай, оҕолоро бары тэрийэн ыыппыттарыгар байаныыстар ааттарыттан махтанабыт. Бу буолар аҕаҕа сүгүрүйүү күүһэ. Маныаха улахан сабыдыалы 60-с сылларга Ытык Күөлгэ үлэлээн ааспыт Иван Кононович Сысолятин оҥорбута. Үс улуустан мустубут чулуу баянистар, Хаҥаластан Иван Сысолятин, Таттаттан Андрей Андросов, Ньурбаттан Петр Иванов өрөспүүбүлүкэ баянистарын куурсун ыыппыттара. Курсааннар итинтэн сиэттэрэн оройуоннар аайы байаан оонньуутун маассабайдык тарҕаппыттара. Тааттаҕа нэһилиэк аайы хастыы да киһи байаанныыллара. Ол иһигэр Дьүлэйгэ Николай Слепцов уһулуччу үчүгэйдик оонньуура. Манна даҕатан, Саха сиригэр, чуолаан, Тааттаҕа байаан киһи олоҕун киэргэтэр инструмент быһыытынан ордук сайдан кэлбитигэр сүгүрүйүү бэлиэтинэн Улахан Бэлиэ Көстүүнү туруорарга уолдьаста диэн этиилээхпин».