Таатта улууһун баһылыгын бирииһигэр кырачааннарга саахымакка күөн күрэс буолла. Күрэхтэһиигэ нэһилиэктэртэн уопсайа тоҕус оҕо саада кытынна. Бу күн 21 уол, 9 кыыс эрбии тииһин курдук эристилэр.
Күрэхтэһии туһунан нуучча дуобатыгар маастарга кандидат, РФ үөрэҕирии туйгуна, СӨ үөрэҕирии бочуоттаах бэтэрээнэ, Ытык Күөллээҕи «Сулусчаан» оҕону сайыннарар киин-оҕо саадын эбии үөрэхтээһиҥҥэ иитээччитэ, дуобакка 2004, саахымакка 2012 сылтан утумнаахтык дьарыктыыр Мария Картузованы кытта кэпсэттим. Мария Егоровна кэпсииринэн, быйылгы күрэскэ бастаабыт «Сулусчаан» оҕо саадын иитиллээччитэ Аня Аржакова 2016 сылга эмиэ бастаабыт (тренер М.Картузова). Тренер иитиллээччитэ ити көрдөрүүтүн чиҥэппититтэн ис сүрэҕиттэн үөрэр. Салайааччылар түмсэн кэпсэтиилэригэр инникитин Илин Эҥэр улуустарга сыл аайы улуустарынан көһө сылдьан оҕо саадтарын иитиллээччилэригэр күрэхтэһиилэри тэрийэн ыытарга сүбэлэспиттэр. Өрөспүүбүлүкэҕэ саахымат оонньуутун сатабылларын иҥэриигэ кыра саастаах элбэх оҕону хабар инниттэн маннык санааҕа кэлбиттэр.
Балачча тиритиилээх-хорутуулаах сытыы күрэхтэһии кэнниттэн үөрүүлээх быһыыга-майгыга кырачаан спортсменнары эҕэрдэлээһин буолла. Бастакы миэстэҕэ уолаттарга «Березка» оҕо саадын иитиллээччитэ Саша Черкашин, иккискэ «Сулусчаан» оҕо саадын иитиллээччитэ Миша Софронов, кыргыттарга Ытык Күөлтэн «Березка» оҕо саадыттан (тренердэр аҕа кыыһынаан Мирян Прокопьевич уонна Надежда Софроновтар) Наташа Михайлова, үһүс бириистээх миэстэҕэ уолаттарга «Сулусчаантан» Айсен Макаров, кыргыттарга Ытык Күөл «Кэнчээри» оҕо саадыттан Маша Пахомова (тренер М.Сорова) тахсыбыттар. «Кэскиллээх оонньооччу» диэн анал ааты «Березка» оҕо саадыттан Витя Неустроев, «Сулусчаантан» Алина Парфенова, «Кыайыыга дьулуурун иһин» ааты «Сулусчаантан» Егор Тарабукин, Ытык Күөл «Туллукчаана» оҕо саадыттан Сардаана Федорова (тренер В.Кривошапкин) ыланнар тренердэрин, төрөппүттэрин үөртүлэр. Күрэхтэһиигэ Чурапчы сэлиэнньэтиттэн «Улыбка» оҕо саадын түөрт иитиллээччитэ зачёту таһынан оонньоотулар (тренер Н.Васильев). Манна биир уһулуччу үчүгэйдик оонньуур оҕо баарын бэлиэтии көрбүттэр. Тренердэр, Даайа Амматтан С.Прохорова уонна Боробултан М.Андросова иитиллээччилэрэ эмиэ балачча үчүгэйдик бэлэмнэммиттэрин көрдөрбүттэр.
Күрэхтэһии кылаабынай судьуйатынан «Сулусчаан» оҕо саадыгар сүбэһит тренердиир Александр Попов үлэлээтэ.
СӨ бастакы бэрэсидьиэнэ М.Николаев саахымакка дьарыгы кыра саастаах оҕолортон саҕалаан оскуолаҕа киллэрэр туһунан этиитигэр олоҕуран, Тааттаҕа оҕо саадтарыгар саахыматы, дуобаты киллэрэн утумнаах үлэ ыытылларын иитээччилэр, тренердэр киэн туттан этэллэр. Маныаха тиһиктээх дьарык түмүгэ чахчы да ситиһиилэри тосхойоро үөрдэр.