Тааттаҕа предпринимателлэри өйүүр улуустааҕы Киин көҕүлээһининэн, оскуола оҕолорун бу эйгэни кытта билиһиннэрии саҕаланна. Бастакы маастар-кылааһы минньигэс тортары, пирожнайдары о.д.а. оҥорон атыылыыр Марина Григорьева ыытта.
Предприниматель Марина Григорьева бэйэтин дьыалатын 2015 сыллаахха саҕалаабыта. Бастаан атаҕар турарыгар киниэхэ улуустааҕы дьарыктаах буолуу Киинэ уонна улуус дьаһалтата өйөбүл буолбуттара.
Бизнес-инкубатор дьиэтигэр маастар-кылаастарга 5-10 кылаастар үөрэнээччилэриттэн 31 оҕо кыттыыны ылла. Оҕолор астыы үөрэммит, уопуттаах маастар үлэтин илэ көрөн, сэргээн, бэйэлэрэ кыттан, оҥорон көрөн, бэркэ сэҥээрэн астынан бардылар.
Оҕолор сэргэх тэрээһиҥҥэ кондитер идэтин биир түгэҥҥэ сиһилии көрдүлэр. Онон, инникитин оҕолор идэлэрин талалларыгар да бу маннык дьаһаллар туһалаахтара чахчы.
Мантан инньэ предпринимательство эйгэтигэр ылсан үлэлиир таатталар нэдиэлэ аайы араас хайысхаларынан бэйэлэрин идэлэрин, сатабылларын көрдөрүөхтэрэ, кэпсиэхтэрэ.