Улуус олоҕо: Амма бастыҥ дуобаччыт кыыһа Ира быйыл Россияҕа хайаан даҕаны бастыырга бэлэмнэнэр

790

«Сахамедиа» холдинг улуустар олохторун сырдатар бырайыагын салгыыбыт. Россияҕа дуобакка бастыыр туһунан күүстээх санааны ылынан сылдьар Амма орто оскуолатын онус кылааһын үөрэнээччитэ, улуустааҕы спорт оскуолатын иитиллээччитэ Ира Птицынаны кытта көрсөн кэпсэттибит.  Кини нуучча дуобатыгар иккис кылаастан саҕалаан дьарыктанар, спорт маастарыгар хандьытаат.


Ира бастакы тренерэ – Владимир Владимирович Иванов. Кини барбытын кэнниттэн быйылгы үөрэх дьылыгар норуоттар икки ардыларынааҕы гроссмейстер, Амма Болугуруттан төрүттээх эдэр тренер Андрей Егорович Федотовка уһуйулла сылдьар.

Ира ситиһиилэрэ: Эстонияҕа ыытыллыбыт аан дойду күрэхтэһиитигэр уонна Европаҕа 2-с, Россия чемпионатыгар 2-с уонна 3-с миэстэлэрдээх. Иллэрээ сыл Бүтүн Россиятааҕы турнирга бастаабыт. Былырыын Дьокуускайга “Азия оҕолоро” норуоттар икки ардыларынааҕы спорт оонньууларыгар үрүҥ көмүс мэтээли ылбыт.

Оҕолорго эн курдук биллэр-көстөр, ситиһиилээх дуобатчыт өссө баар дуо?” – диэн ыйыппыппар, Өнньүөс оскуолатыгар аан дойдуга призердаабыт Юля Устинова баарын эттэ.

Ира сүүс харахтаах дуобакка бэйэтин холонон күрэхтэһэн үһүс буола сылдьыбыт гынан баран, 64 харахтааҕы ордорор эбит. Аҕыйах саҥалаах, сэмэй майгылаах кыыс дуобат кистэлэҥнэригэр үөрэтэр тренердэригэр махтанар. Гроссмейстерга оҕо эрэ барыта дьарыктаммат ээ. Ол даҕаны иһин Ира Птицына Россия чемпионатыгар бастыыр баҕа санаата күүһүрдэҕэ.

Итиччэ киирэ сылдьан баран, Амматааҕы спорт оскуолатын туһунан кылгастык билиһиннэриим. Оскуола 10 хайысхалааҕыттан саамай тумус тутталлара – көҥүл тустуу, волейбол уонна мас тардыһыы. Оскуола дириэктэрэ Эдуард Ефимов этэринэн, нэһилиэктэрдээҕи филиалларын кытта улуус үрдүнэн 2800 үөрэнээччиттэн 1152-тин хабаллар.

Аммаҕа эһиил сайын Саха Өрөспүүбүлүкэтин норуоттарын спартакиадата ыытылларынан, улуус тренердэригэр улахан итэҕэл сүктэриллэрин Эдуард Васильевич этэр. Күрэхтэһиигэ оскуола үөрэнээччилэрэ кыттаннар зачет биэриэхтэрэ.
Саалабытын киэһэ уонна өрөбүллэргэ улахан дьон дьарыктаналларыгар уларсабыт. Тренердэрбит дьарыктарга көмөлөһөллөр. Тэрийээччи улуус буоларбытынан, спартакиадаҕа пляжка оонньонуллар волейболу киллэриэхпит. Бу көрүҥҥэ үчүгэйбит”, — диир дириэктэр.

Ирина Птицына, Юлия Устинова курдук оҕолор улааталларын саҕана аммалар дуобатчыттарынан эмиэ аатырыахтара диэн эрэнэбин.