2017 сыл Саха сиригэр Баhаарынай сулууспа тэриллибитэ 200 сылын туолар. Бу сылы Таатта улууһугар 32№-дээх баһаарынай этэрээт кэккэ ситиһиилээх көрүстэ. Ол туһунан олохтоох этэрээт начальнига, баһаарынай сулууспа бэтэрээнэ Д.Д. Дорофеев СИА-ҕа кэпсээтэ.
Тааттатааҕы баhаарынай сулууспа этэрээтин начальнига, баһаарынай сулууспа бэтэрээнэ Д.Д. Дорофеев кэпсииринэн, 2015 сыл бүтүүтэ икки, 2016 сылга этэрээт баһаарнай чаастарыгар «Урал» массыына базатыгар оҥоһуллубут үс саҥа бойобуой баһаарынай массыына кэлбит. Тиэхиникэлэри нэһилиэктэргэ баар баһаарнай чаастарга бойобуой үлэҕэ туруорбуттар.
Россияҕа «Киинэ сылынан» сибээстээн ыытыллыбыт Саха сирин Госкомитетын баһаарынай темаҕа ыыппыт куонкуруһугар этэрээт баһаары сэрэтэр отделениетын инструктордара, Баһаары утары сулууспа туйгуна И.П.Мартынова, К.Ю.Сидоров оҥорбут видеороликтара өрөспүүбүлүкэҕэ 3-с миэстэни ылбыт. Салгыы кини бу курдук кэпсиир: «2016 сыл сайыныгар Ытык Күөлү харабыллыыр бастакы нүөмэрдээх баһаарынай чааска үөрэнэр-эрчиллэр башня тутуллан, Таатта нэһилиэгэ тэриллибитэ 100 сылын көрсө үлэҕэ киирбитэ. “Үйэ Башнята” диэн ааттаабыппыт уонна кэлэр көлүөнэ баһаарынайдарыгар сурук суруйан, кэс тылбытын эппит “Бириэмэ капсулата” оҥороммут акылаатыгар кистээбиппит. Бу капсуланы аны Ытык-Күөлбүт 120 сылыгар, 2036 сылга аһарга диэн сүбэлэспиппит«.
Этэрээт начальнигын солбуйааччы И.Ф. Рахлеев өрөспүүбүлүкэтээҕи куонкуруска кыттан «Лучший пропагандист пожарной безопасности» диэн номинация ылбыт. Россия күнүгэр Иван Федотович РФ бырабыыталыстыбатыттан патриотическай иитиигэ киллэрбит кылаатын иһин «Патриот России» мэтээлинэн наҕарадалламмыт. Бүтүн Россиятааҕы ЫБММ ыытар “Созвездие мужества” региональнай куонкурсугар өрөспүүбүлүкэҕэ бастаабыт, оттон Уһук Илиҥҥэ 2-с миэстэни ылан “Чрезвычайный блогер” номинациятыгар тахсыбыт. Дипломнарынан, анал бэлиэнэн наҕараадаламмыт.
Харбалаахтааҕы дьоҕус 2№-дээх баһаарынай чаас начальнига, баһаары утары сулууспа бэтэрээнэ В.В.Попов сатабыллаахтык дьаһанан, үлэһиттэр бэйэлэрин илиилэринэн саҥа депо дьиэтин тутан үлэҕэ киллэрдилэр.
Сулууспа иhинэн ыытыллар идэлээхтэр өрөспүүбүлүкэтээҕи күрэхтэригэр Ытык Күөлү харабыллыыр 1№-дээх баһаарынай чаас суоппара Вадим Дягилев 3-с бочуоттаах миэстэни ылан, кубогынан, грамотанан, сыаналаах бэлэҕинэн наҕараадаламмыт. Бу атын суоппардарга бастыҥ холобур буолар.
2016 сыл бүтүүтэ Саха сирин баһаары утары сулууспата 199 сылын бэлиэтиир күннэригэр олорор дьиэҕэ баһаар туран ыксаллаах быһыы-майгы буолбута. Онно «СӨ баһаары утары сулууспа туйгуна» анал бэлиэнэн наҕараадаламмыт 2-с караул начальнига И.И.Барбасытов сөптөөх хайысханы ыйан баһаар түргэнник умулларыллыбыт.
«Ханнык баҕарар быһыыга-майгыга бары үлэһиттэр, сулууспалар тэҥҥэ үлэлиибит. Түмүк элбэх сыралаах үлэттэн кэлэр. Бу кэлбит сылга араас үөрэхтэр, эрчиллиилэр барыахтара, ону таһынан элбэх тэрээһин былааннанар. Ол курдук тепло, -дымо камера оҥоһуллуохтаах. Маны башнябытын туппуппут курдук улуус, нэһилиэк дьаһалталара, бииргэ үлэлиир тэрилтэлэрбитин кытта биир сомоҕо буолан, көмөлөөн оҥоруохпут диэн эрэллээхпин», — диэн кэпсээнин түмүктээтэначальник.
Баһаарынай чааска 2009 сылтан начаалынньыгынан Виктор Новиков үлэлиир. Виктор Константинович аҥардас баһаарынньыгынан 26 сыл (байыас, суоппар, караул, этэрээт начаалынньыга) үлэлээн кэллэ. Үөһээ Бүлүү улууһун бочуоттаах гражданина, Россия бочуоттаах донора (устудьуоннуу сылдьыаҕыттан 100-кэтэ хаан биэрбит). Онон байыастарыгар эргиччи холобур буолар салайааччы.
