Метка: Байыаннай чаас

Омоҕой оҕонньор саҕаттан олохтоммут оонньуу Бикинҥа ыытылынна

Саха сириттэн элбэх саллаат сулууспалаан ааспыт 57–с мотострелковай биригээдэтэ Бикинҥа баар. Манна араас батальонҥа — танковайга, артиллерияҕа, мотострелковайга, разведкаҕа уо.д.а. армейскай олоҕу, олох оскуолатын ааспыттара.

Бикинҥа төһө да сайынын куйаас уонна сииктээх салгыннааҕын, кыһынын тымныы, сииктээх тыаллааҕын иһин сыыйа-баайы айылҕатыгар, сиригэр-уотугар, күнүгэр-дьылыгар саллааттар үөрэнэллэр. Сулууспалыырга уонна байыаннай дьарыкка уһаарылларга усулуобуйа барыта баар.

Ыам ыйын 30 күнүгэр Бикинҥа Саллааттар уонна мотуруостар төрөппүттэрин Кэмитиэтин салайааччыта Мария Емельянова киэҥ сэргэх тэрээһин ыытта. Өбүгэлэр илдьэ кэлбит үгэстэрин тутуһан алгысчыт аал уот оттон, сахалыы сиэри-туому толордо. Саллааттар алгыс ылынан, Омоҕой оҕонньор саҕаттан олохтоммут оонньууга бары бииргэ түмсэн – оһуохайдаатылар, хапсаҕайга күрэстэһэн ханыыластылар уонна мас тардыһан хачыгыратыһан күүс-уох эбиннилэр.

Ыһыах бастыҥ аһын кымыһы иһэн, мип-минньигэс саһарчы буспут алаадьы амсайан олус астыннылар, дуоһуйдулар. Бикин саллааттара күндү ыалдьыттарга Мария Егоровнаҕа, ийэлэргэ үөрүүлэрин эттилэр, сиэри-туому ыыппыт алгысчыкка, культура колледжын устудьуонугар Уйгу Семеновка барҕа махталларын биллэрдилэр уонна дьонноругар, доҕотторугар уруйдаан-айхаллаан эҕэрдэ тириэртилэр.

Бикинҥа сулууспалыыр Саха сириттэн саллааттар  олус түмсүүлээхтэр, биир дойдулаахтарын кытта өйөһөн-өйдөһөн этэҥҥэ сылдьаллар.

Млечникка, Князеволконскайга уонна Анастасьевкаҕа саллааттары кытта көрсүһүүлэр буоллулар

Салааттар уонна мотуруостар төрөппүттэрин Кэмитиэтин салайааччыта Мария Емельянова ыам ыйын 28-29 күннэригэр Хабаровскай куорат аттыгар баар байыаннай чаастары кэрийдэ. Манна Саха сириттэн элбэх саллаат сулууспалыыр. Князеволконскайга – уопсай войсковой үөрэтэр чааска, Млечникка — мотострелковай чааһыгар, Большой аэродромнайга — салгын күүстэрин чааһыгар уонна Анастасьевкаҕа -танковай чааһыгар уолаттары кытта көрүстэ.

Уопсай войсковай үөрэтэр Князеволконскайдааҕы чаастан үгүс байыаннай эбээһинэстээхтэр 6 ыйдааҕы үөрэхтэрин кэнниттэн, салгыы араас войсковой чаастарынан тарҕаннылар. Бу күннэргэ Саха сириттэн сааскы ыҥырыы оҕолоро кэлэн сулууспаларын саҕалаатылар. Армияҕа саҥа кэлбиттэргэ үтүө-мааны тыллары Мария Егоровна туһаайан эттэ. «Киэҥ көхсүлээх буолуҥ, кытаанах санааланыҥ, бэйэҕитин көрүнэ сылдьыҥ, биир сылгытын этэҥҥэ сулууспалаан, ытык иэскитин толорон дойдугутугар тиийээриҥ. Эр киһи буолуҥ, Эр хоһуун буолуҥ!«, — диэн тылларынан көрсүһүү түмүктэннэ.

Млечникка, Анастасьевкаҕа ыһыахха эмиэ үгэс курдук алгыс тыл үтүөтэ этилиннэ, алыптаах оһуохай ылланна, уолаттарга күүс иҥэрилиннэ. Саха былыргыттан күрэстэһэр оонньуутунан мас тардыһыытынан түмүктээтилэр.

Санатар эбит буоллахха, бу саас, кулун тутар ыйга, эмиэ Мария Егоровна көҕүлээһининэн бу үөһэ этиллибит чаастарга саллааттары кытта төрөппүттэр десаннарын көрсүһүүлэрэ буолан ааспыта. Онно ийэлэр чөл олох, сулууспа кэнниттэн үөрэххэ, үлэҕэ киирии туһунан кэпсээбиттэрэ, сүбэ-соргу тириэрдибиттэрэ. Маны таһынан, төрөөбүт тылларынан Ийэ туһунан ырыа, олоҥхо, тойук, оһуохай истэн, түөлбэлэригэр ахтылҕаннарын таһаарбыттара Ол туһунан суруйан турабыт.

Ыспыраапка: Саллааттар ийэлэрин тэрээһин мунньаҕын быһаарыытынан 1991 сыллаахха сэтинньи ыйын 24 күнүгэр Салааттар уонна мотуруостар төрөппүттэрин Саха Өрөспүүбүлүкэтин Кэмитиэтэ тэриллибитэ. Ол кэмтэн номнуо 26 сыл ааста. Бу Кэмитиэт саҥа армияҕа ыҥырыллыбыттар, байыаннай сулууспалаахтар, быстах (локальнай) сэрии кыттыылаахтарын уонна кинилэр дьиэ кэргэттэрин бырааптарын көмүскүүргэ аналлаах тэриллибитэ. Ыччаты патриотическай хайысхалаах иитиигэ, байыаннай сулууспаны үрдүктүк тутууга, сэриигэ өлбүттэр ааттарын үйэтэтиигэ былаас уорганнарын, общественнай түмсүүлэри кытта бииргэ үлэлиир.

Маннык аадырыска билсиэххитин сөп:
677000, Дьокуускай куора, Орджоникидзе уулуссатын 10 дьиэтэ, 200А офис.
Телефон/факс: 8(4112) 420828
Электроннай почта: suola-maria@mail.ru
Бэрэссэдээтэл — Емельянова Мария Егоровна.

Ытык иэстэрин толоро сылдьар саллааттар ыһыахтыыллар

Саллааттар уонна мотуруостар төрөппүттэрин кэмитиэтин салайааччыта Мария Емельянова ыам ыйын 17-20 күннэригэр Забайкальскай кыраайга баар байыаннай чаастарга сылдьан, Саха сириттэн саллааттары кытта Песчанкаҕа, Каштакка, Борзяҕа көрсүстэ. Маны таһынан Забайкальскай саллааттарын ийэлэрин кэмитиэтин салайааччытын Валентина Мордвовалыын байыаннай госпитальга сырыттылар.

Ыам ыйын 26-27 күннэригэр Амур уобалаһыгар тиийэн — Свободнайга, Серышевоҕа, Екатеринославкаҕа, Белогорскайга баар чаастарга — Ыһыахтары тэрийэн ыытта. Ол курдук, самаан сайын кэлбитинэн сахалыы алгыс сиэрэ-туома, ойор-тэбэр оһуохай, өбүгэ оонньуулара: мас тардыһыыта, хапсаҕай ыытылыннылар. Күрэх кыттыылаахтарыгар Мария Егоровна бэлэхтэри туттарда. Кини байыаннай чаас хамандыырдарыгар төрөппүттэр ааттарыттан оҕолор сулууспалыылларыгар сөптөөх усулуобуйа тэриллибитин ыйан туран махтал тылларын, үтүө санаатын тириэртэ.

Бу чаастарга Саха сирин араас улуустарыттан оҕолор ытык иэстэрин толоро сылдьаллар. Армияҕа сулууспа хас биирдии саллаакка, төрөппүккэ олохторугар умнуллубат түгэн, тоҕо диэтэххэ, эр киһилии кытаанах санаалаах буолуу, эт-хаан өттүнэн уол оҕо манна уһаарыллар, дьиҥнээх армейскай доҕоттор аттыгар бааллара сыаналанар.

«Ийэлэр кэмитиэттэрин үлэтин туһунан иһиттибит, кэлбиттэриттэн наһаа үөрдүбүт уонна үөрэбит, дойдубутугар ахтылҕаммытын таһаардыбыт. Сулууспабыт этэҥҥэ баран иһэр. Кэмитиэт үлэтин бэрткэ сыаналыыбын. Саас эмиэ кэлэн барбыттара, бүгүн Ыһыах буолла. Сахалыы таҥастаах ийэлэри көрөр олус үчүгэй эбит. Саҥа сулууспалыы кэлбит уолаттары көрсөн кэпсэттибит, билистибит. Кинилэргэ этэҥҥэ, туохтан да толлубат сулууспаны баҕарабыт. Түгэнинэн туһанан, ийэлэр кэмитиэттэригэр барҕа махталбытын тириэрдэбит«, — диэн санааларын үллэһиннилэр уолаттар.

Салгыы тэрээһиннэр ыам ыйын 28 күнүттэн Хабаровскай кыраайга салгын күүстэрин чааһыттан саҕаланнылар. Ыам ыйын 29 күнүгэр Хабаровскай, Приморскай кыраайдар атын чаастарыгар ыытыллыа.