Метка: Сулууспа

Сунтаар уолаттара аармыйаҕа сулууспалыы бардылар

Сунтаарга Ыччат дьиэтигэр уолаттары аармыйаҕа атаарыы буолла. Күһүҥҥү ыҥы­рыкка 1990-1999 сыл төрүөх уолаттар киирсэллэр. Олор истэригэр ааспыт өттүгэр ханнык эмэ биричиинэнэн барбакка хаалбыт дьон баар.

Сунтаардааҕы байаҥкамаат күһүҥҥү ыҥырыкка 35 уолу хабан ыытар былааннаах. Бастакы бөлөх — алта уол — сэтинньи 10 күнүгэр Дьокуускайга призывниктары хомуйар пууҥҥа, норуокка биллэринэн «Маякка» тиийиэхтэрэ. Онно хат­таан медицинскэй көрүүнү ааһан баран, сулууспалыыр чаастарыгар барыахтара.

Тэрээһиҥҥэ уонтан тахса уол кэлбит. Кинилэргэ анаан улуустааҕы үөрэх управлениетын ычча­ты өйүүр социальнай-психологи­ческай киин үлэһиттэрэ кэлэн көрүстүлэр, боппуруостарга эппиэттээтилэр. Бэйэ дьиэтиттэн тэйии сорох эдэр киһиэхэ ыарахаттары үөскэтиэн сөп. Онон атын эйгэҕэ хайдах тутта-хапта сылдьар туһунан сүбэлээтилэр. Улуус байыаннай хамыһаара Игорь Данилов аармыйа күннээҕи олоҕун туһунан кылгастык били­һиннэрдэ.

Быйылгы ыҥырык уолаттара сытыылар-хотуулар. Аармы­йаҕа сулууспалыыр наадатын өйдүүллэр. Сулууспалаабыт киһи үөрэх кыһаларыгар кэккэ чэпчэ­тиилэри туһанан киирэр уонна инники олохторун оҥостоллоругар бары өттүнэн табыгастаах. Үлэлэригэр үрдүүллэригэр аан аһыллар.

Билигин аармыйаҕа сулууспа­лыыр болдьохторо биир сыл. Былырыын баччаларга барбыт уолаттар болдьохторо бүтэн, би­ри­кээстэрэ тахсан, төннөн эрэллэр.

Млечникка, Князеволконскайга уонна Анастасьевкаҕа саллааттары кытта көрсүһүүлэр буоллулар

Салааттар уонна мотуруостар төрөппүттэрин Кэмитиэтин салайааччыта Мария Емельянова ыам ыйын 28-29 күннэригэр Хабаровскай куорат аттыгар баар байыаннай чаастары кэрийдэ. Манна Саха сириттэн элбэх саллаат сулууспалыыр. Князеволконскайга – уопсай войсковой үөрэтэр чааска, Млечникка — мотострелковай чааһыгар, Большой аэродромнайга — салгын күүстэрин чааһыгар уонна Анастасьевкаҕа -танковай чааһыгар уолаттары кытта көрүстэ.

Уопсай войсковай үөрэтэр Князеволконскайдааҕы чаастан үгүс байыаннай эбээһинэстээхтэр 6 ыйдааҕы үөрэхтэрин кэнниттэн, салгыы араас войсковой чаастарынан тарҕаннылар. Бу күннэргэ Саха сириттэн сааскы ыҥырыы оҕолоро кэлэн сулууспаларын саҕалаатылар. Армияҕа саҥа кэлбиттэргэ үтүө-мааны тыллары Мария Егоровна туһаайан эттэ. «Киэҥ көхсүлээх буолуҥ, кытаанах санааланыҥ, бэйэҕитин көрүнэ сылдьыҥ, биир сылгытын этэҥҥэ сулууспалаан, ытык иэскитин толорон дойдугутугар тиийээриҥ. Эр киһи буолуҥ, Эр хоһуун буолуҥ!«, — диэн тылларынан көрсүһүү түмүктэннэ.

Млечникка, Анастасьевкаҕа ыһыахха эмиэ үгэс курдук алгыс тыл үтүөтэ этилиннэ, алыптаах оһуохай ылланна, уолаттарга күүс иҥэрилиннэ. Саха былыргыттан күрэстэһэр оонньуутунан мас тардыһыытынан түмүктээтилэр.

Санатар эбит буоллахха, бу саас, кулун тутар ыйга, эмиэ Мария Егоровна көҕүлээһининэн бу үөһэ этиллибит чаастарга саллааттары кытта төрөппүттэр десаннарын көрсүһүүлэрэ буолан ааспыта. Онно ийэлэр чөл олох, сулууспа кэнниттэн үөрэххэ, үлэҕэ киирии туһунан кэпсээбиттэрэ, сүбэ-соргу тириэрдибиттэрэ. Маны таһынан, төрөөбүт тылларынан Ийэ туһунан ырыа, олоҥхо, тойук, оһуохай истэн, түөлбэлэригэр ахтылҕаннарын таһаарбыттара Ол туһунан суруйан турабыт.

Ыспыраапка: Саллааттар ийэлэрин тэрээһин мунньаҕын быһаарыытынан 1991 сыллаахха сэтинньи ыйын 24 күнүгэр Салааттар уонна мотуруостар төрөппүттэрин Саха Өрөспүүбүлүкэтин Кэмитиэтэ тэриллибитэ. Ол кэмтэн номнуо 26 сыл ааста. Бу Кэмитиэт саҥа армияҕа ыҥырыллыбыттар, байыаннай сулууспалаахтар, быстах (локальнай) сэрии кыттыылаахтарын уонна кинилэр дьиэ кэргэттэрин бырааптарын көмүскүүргэ аналлаах тэриллибитэ. Ыччаты патриотическай хайысхалаах иитиигэ, байыаннай сулууспаны үрдүктүк тутууга, сэриигэ өлбүттэр ааттарын үйэтэтиигэ былаас уорганнарын, общественнай түмсүүлэри кытта бииргэ үлэлиир.

Маннык аадырыска билсиэххитин сөп:
677000, Дьокуускай куора, Орджоникидзе уулуссатын 10 дьиэтэ, 200А офис.
Телефон/факс: 8(4112) 420828
Электроннай почта: suola-maria@mail.ru
Бэрэссэдээтэл — Емельянова Мария Егоровна.

Ытык иэстэрин толоро сылдьар саллааттар ыһыахтыыллар

Саллааттар уонна мотуруостар төрөппүттэрин кэмитиэтин салайааччыта Мария Емельянова ыам ыйын 17-20 күннэригэр Забайкальскай кыраайга баар байыаннай чаастарга сылдьан, Саха сириттэн саллааттары кытта Песчанкаҕа, Каштакка, Борзяҕа көрсүстэ. Маны таһынан Забайкальскай саллааттарын ийэлэрин кэмитиэтин салайааччытын Валентина Мордвовалыын байыаннай госпитальга сырыттылар.

Ыам ыйын 26-27 күннэригэр Амур уобалаһыгар тиийэн — Свободнайга, Серышевоҕа, Екатеринославкаҕа, Белогорскайга баар чаастарга — Ыһыахтары тэрийэн ыытта. Ол курдук, самаан сайын кэлбитинэн сахалыы алгыс сиэрэ-туома, ойор-тэбэр оһуохай, өбүгэ оонньуулара: мас тардыһыыта, хапсаҕай ыытылыннылар. Күрэх кыттыылаахтарыгар Мария Егоровна бэлэхтэри туттарда. Кини байыаннай чаас хамандыырдарыгар төрөппүттэр ааттарыттан оҕолор сулууспалыылларыгар сөптөөх усулуобуйа тэриллибитин ыйан туран махтал тылларын, үтүө санаатын тириэртэ.

Бу чаастарга Саха сирин араас улуустарыттан оҕолор ытык иэстэрин толоро сылдьаллар. Армияҕа сулууспа хас биирдии саллаакка, төрөппүккэ олохторугар умнуллубат түгэн, тоҕо диэтэххэ, эр киһилии кытаанах санаалаах буолуу, эт-хаан өттүнэн уол оҕо манна уһаарыллар, дьиҥнээх армейскай доҕоттор аттыгар бааллара сыаналанар.

«Ийэлэр кэмитиэттэрин үлэтин туһунан иһиттибит, кэлбиттэриттэн наһаа үөрдүбүт уонна үөрэбит, дойдубутугар ахтылҕаммытын таһаардыбыт. Сулууспабыт этэҥҥэ баран иһэр. Кэмитиэт үлэтин бэрткэ сыаналыыбын. Саас эмиэ кэлэн барбыттара, бүгүн Ыһыах буолла. Сахалыы таҥастаах ийэлэри көрөр олус үчүгэй эбит. Саҥа сулууспалыы кэлбит уолаттары көрсөн кэпсэттибит, билистибит. Кинилэргэ этэҥҥэ, туохтан да толлубат сулууспаны баҕарабыт. Түгэнинэн туһанан, ийэлэр кэмитиэттэригэр барҕа махталбытын тириэрдэбит«, — диэн санааларын үллэһиннилэр уолаттар.

Салгыы тэрээһиннэр ыам ыйын 28 күнүттэн Хабаровскай кыраайга салгын күүстэрин чааһыттан саҕаланнылар. Ыам ыйын 29 күнүгэр Хабаровскай, Приморскай кыраайдар атын чаастарыгар ыытыллыа.