Метка: Ытык иэс

Мэҥэ Хаҥалас улууһун 46 уола аармыйаҕа сулууспалыы барда

Бүтүн Россиятааҕы аармыйаҕа ыҥырыллааччылар күннэрин көрсө Мэҥэ Хаҥалас улууһуттан 46 уол сүүмэрдэнэн ытык иэстэрин төлүү барар.

Д.Ф.Ходулов аатынан Майатааҕы норуот айымньытын дьиэтигэр улуус баһылыгын бастакы солбуйааччы Павел Сазонов, улуустааҕы ыччат бэлиитикэтигэр уонна дьиэ кэргэн дьыалаларыгар управление сүрүннүүр исписэлииһэ Василий Филиппов, СӨ Мэҥэ Хаҥаластааҕы уонна Уус Алданнааҕы байыаннай комиссариат комиссара Аял Петров, бойобуой дьайыыларга кыттыбыт бэтэрээннэр «Доблесть» түмсүүлэрин салайааччыта Николай Семенов, интернационалист-буойун Валерий Шарин уонна улуустааҕы дьахталлар сэбиэттэрин бэрэссэдээтэлэ Евдокия Иванова аармыйа кэккэтигэр ыҥырыллыбыт уолаттары сулууспалыы баралларынан эҕэрдэлээтилэр, «Алгыс» бэтэрээннэр кулууптарын кэрэ аҥардара арыылаах алаадьынан күндүлээтилэр.

Уолаттарга аармыйаҕа баран этэҥҥэ сулууспалаан кэлэллэригэр баҕа санааларын эттилэр. «Биһиги улууспутуттан сыллата элбэх уол сулууспалыы барар буолла. Онно доруобуйаларын туруга эппиэттиир, баҕалаахтар. Сааскы ыҥырыллыы түмүгүнэн өрөспүүбүлүкэҕэ иккис миэстэни ылбыппыт. РФ Бэрисидьиэнэ Владимир Путин ыам ыйдааҕы уурааҕар олоҕуран, ытык иэстэрин толорон кэлбит ыччаттар үөрэххэ киириилэригэр, үлэҕэ ылыллалларыгар аартыктара аһаҕас буолуохтаах», ‒ диэн байыаннай комиссариат бэрэссэдээтэлэ Аял Дмитриевич эттэ.

Намҥа сулууспаларын толоро сылдьан өлбүт ис дьыала уорганнарын үлэһиттэрин кэриэстээтилэр

Российскай Федерация Ис дьыала миниистирин бирикээһинэн сэтинньи 8 күнэ сулууспаларын эбээһинэһин толоро сылдьан өлбүт ис дьыала уорганнарын үлэһиттэрин кэриэстиир күнүнэн биллэриллибитэ. Бу күн чэрчитинэн Нам улууһугар «Хорсун быһыы» скверигэр кэриэстэбил буолан ааста.

Нам олохтоохторо сулууспаларын эбээһинэһин толоро сылдьан өлбүт ис дьыала уорганнарын үлэһиттэрин мемориальнай дуоскаларыгар курутуйан туран гирлянда, тыыннаах сибэкки дьөрбөтүн, чүмэчи уматан уурдулар, сырдык кэриэстэригэр анаан үс төгүл аптамаатынан күөх халлаан далайыгар ыттылар.

Кэриэстэбил күҥҥэ Намнааҕы ис дьыала отделын үлэһиттэрэ, ис дьыала ветераннара, сулууспаларын эбээһинэһин толоро сылдьан, сырдык тыыннара быстыбыт ДПС инспектора Альберт Москвитин аҕата Афанасий Егорович, холуобунай ирдэбил оперативнай боломуочунайа, полиция майора Петр Васильев огдообото Надежда Егоровна, «Нам улууһун» баһылыгын солбуйааччы Николай Степанов, Нам улууһун ис дьыалатын бэтэрээннэрин Сэбиэтин председателэ Михаил Павлов уонна тустаах сулууспа салайааччылара кыттыыны ыллылар.

«Бүгүн Бүтүн Россия үрдүнэн сулууспаларын толоро сылдьан өлбүт ис дьыала уорганнарын үлэһиттэрин кэриэстиир күн. Маннык күн баар буолбута тоҕоостоох, тоҕо диэтэххэ, бэрээдэк баар буолуутун уонна дьоҥҥо куттал суоһаабатын туһугар үлэлии сылдьан тыыннарын толук уурбут дьоммутун хайаан да кэриэстиэхтээхпит. Ону чиэстээхтик толорон, улууспутугар Ис дьыала отделын таһыгар «Хорсун быһыы» скверэ баар буолбута. Бу күн сквергэ мустан суох буолбуттарга анаан коллегалара, аймахтара, чугас дьоно, табаарыстара сүгүрүйэбит. Сквер инники ыччаты дойдуга бэриниилээх буоларга үөрэтэр», — диэн «Нам улууһа» МТ баһылыгын солбуйааччы Николай Степанов санаатын эттэ.

Ытык иэстэрин толоро сылдьар саллааттар ыһыахтыыллар

Саллааттар уонна мотуруостар төрөппүттэрин кэмитиэтин салайааччыта Мария Емельянова ыам ыйын 17-20 күннэригэр Забайкальскай кыраайга баар байыаннай чаастарга сылдьан, Саха сириттэн саллааттары кытта Песчанкаҕа, Каштакка, Борзяҕа көрсүстэ. Маны таһынан Забайкальскай саллааттарын ийэлэрин кэмитиэтин салайааччытын Валентина Мордвовалыын байыаннай госпитальга сырыттылар.

Ыам ыйын 26-27 күннэригэр Амур уобалаһыгар тиийэн — Свободнайга, Серышевоҕа, Екатеринославкаҕа, Белогорскайга баар чаастарга — Ыһыахтары тэрийэн ыытта. Ол курдук, самаан сайын кэлбитинэн сахалыы алгыс сиэрэ-туома, ойор-тэбэр оһуохай, өбүгэ оонньуулара: мас тардыһыыта, хапсаҕай ыытылыннылар. Күрэх кыттыылаахтарыгар Мария Егоровна бэлэхтэри туттарда. Кини байыаннай чаас хамандыырдарыгар төрөппүттэр ааттарыттан оҕолор сулууспалыылларыгар сөптөөх усулуобуйа тэриллибитин ыйан туран махтал тылларын, үтүө санаатын тириэртэ.

Бу чаастарга Саха сирин араас улуустарыттан оҕолор ытык иэстэрин толоро сылдьаллар. Армияҕа сулууспа хас биирдии саллаакка, төрөппүккэ олохторугар умнуллубат түгэн, тоҕо диэтэххэ, эр киһилии кытаанах санаалаах буолуу, эт-хаан өттүнэн уол оҕо манна уһаарыллар, дьиҥнээх армейскай доҕоттор аттыгар бааллара сыаналанар.

«Ийэлэр кэмитиэттэрин үлэтин туһунан иһиттибит, кэлбиттэриттэн наһаа үөрдүбүт уонна үөрэбит, дойдубутугар ахтылҕаммытын таһаардыбыт. Сулууспабыт этэҥҥэ баран иһэр. Кэмитиэт үлэтин бэрткэ сыаналыыбын. Саас эмиэ кэлэн барбыттара, бүгүн Ыһыах буолла. Сахалыы таҥастаах ийэлэри көрөр олус үчүгэй эбит. Саҥа сулууспалыы кэлбит уолаттары көрсөн кэпсэттибит, билистибит. Кинилэргэ этэҥҥэ, туохтан да толлубат сулууспаны баҕарабыт. Түгэнинэн туһанан, ийэлэр кэмитиэттэригэр барҕа махталбытын тириэрдэбит«, — диэн санааларын үллэһиннилэр уолаттар.

Салгыы тэрээһиннэр ыам ыйын 28 күнүттэн Хабаровскай кыраайга салгын күүстэрин чааһыттан саҕаланнылар. Ыам ыйын 29 күнүгэр Хабаровскай, Приморскай кыраайдар атын чаастарыгар ыытыллыа.