Метка: Россия күнэ

Тааттаҕа Россия күнүн дьоһуннаахтык бэлиэтээтилэр

Таатталар Россия күнүн дьоһуннаах тэрээһиннэринэн көрүстүлэр. Дьону сомоҕолуур, биир тыыҥҥа иитэр үтүө холобурдары көрдөрдүлэр.

Россия күнүгэр Таатта улууһун култуураҕа уонна духуобунай сайдыыга салалтатын кэлэктиибэ сынньалаҥ уонна култуура пааркатыгар өрөгөйдөөх тэрээһини ыытта.  Өрө көтөҕүллүүлээхтик бэлиэтээһин үөрүүлээх чааһын кэнниттэн, улуус киинигэр турар Платон Алексеевич Ойуунускай аатынан народнай тыйаатыр тиэргэнин, Былатыан Ойуунускай скверин, пааматынньыгын тыһыынчаттан тахса эгэлгэ сибэккилэринэн симээтилэр. Онон култуура үлэһиттэрэ ыччаты иитиигэ бастыҥ холобуру көрдөрдүлэр. Бу туһунан култуура уонна духуобунай сайдыы салайааччытын солбуйааччы М.В.Степанова иһитиннэрдэ.

Тааттатааҕы спорткомитет салалтата иһитиннэрбитинэн, бу күн култуура уонна сынньалаҥ пааркатын стадионугар алта хамаанда олбуор иһинээҕи футболга күрэхтэстилэр. Күрэхтэһии тыҥааһыннаахтык ыытылынна. Түмүккэ бастакы миэстэҕэ Ытык Күөл футболистара таҕыстылар. Туора Күөл икки хамаанданы туруорда. Иккис-үһүс миэстэлэри туора күөллэр ыллылар.

Булуҥнааҕы Киин кырдьаҕастара Россия күнүгэр таайбараҥ таайан сэргэхсийдилэр

Дойду үрдүнэн хас сыл аайы Россия күнэ улахан таһымнаахтык ааһар. Тиксиигэ бу күннэргэ библиотека үлэһитэ Вуталина Стручкова кырдьаҕастары уонна инбэлииттэри көрөр-истэр кииҥҥэ тиийэн Арассыыйа күнүгэр анаммыт өйү-санааны сэргэхситэр элбэх таабырыннардаах тэ­рээ­һини тэрийэн ыытта.

Вуталина Стручкова киин олохтоох­торугар бу бырааһынньык историятын билиһиннэрдэ. Ону таһынан кинигэ быыс­тап­катын туруорда, кинигэлэри билиһиннэрэн, ырытан кэпсээтэ. Кырдьаҕас дьон олус интириэһэргээн иһитилэр уонна библиотека үлэһитигэр махтаннылар. Маннык кинигэ кэп­сээһинин кэннэ тустаах үлэһит аҕалтаабыт кинигэлэрин интэриэһэргээн, уларсан ааҕан сэргэхсийэллэрин эттилэр.

Тэрээһини Арассыыйа историятытыгар сыһыаннаах таабырыннары таайан уонна викторина оонньоон түмүктээбиттэр. Кырдьаҕастар ордук таабырын таайал­ларын, оонньуулларын олус сөбү­лүүллэрин библиотека үлэһитэ ыйар.

“Кырдьаҕастары уонна инбэлииттэри көрөр-истэр кииҥҥэ бэлиэ, бырааһын­ньыктааҕы күннэргэ араас таһымнаах тэрээһиннэри ыытабыт. Киин социальнай үлэһитин Туйаара Никифоровалыын “Кө­мүс күһүн” диэн бөлөх тэрийбиппит номнуо хас да сыл буолла. Бөлөхпүтүгэр ортотунан 15 кэриҥэ киһи сылдьар, сорох ардыгар элбээн да ылабыт, соро­ҕор аҕыйыыбыт. Дьоммутун сэргэхситээри араас биэ­чэрдэри ыытабыт. Мин тус бэйэм кырдьаҕастарга литературнай хайыс­хаҕа сыһыаннаах интеллектуальнай оонньуулары ыытабын. Холобура, Саха си­ригэр киэҥ биһирэбили ылбыт “Тол­куйдаа, оонньоо, кыай” оонньууга май­гыннатан, киин олохтоохторугар анаан оннук курдук оонньуулары толкуйдуубут. Инники былааммыт өссө да элбэх. 2017 сыл Экология сылынан биллэриллибитинэн сибээстээн, экология­ҕа сыһыаннаах оонньуулары ыыппытым”, – диэн Стручкова кэпсиир.