Улуу олоҥхоһуттар, ытык-мааны талааннаах артыыстар уутуйан үөскээбит 2-с Наахара нэһилиэгэр олохтоохтор уонтан тахса сыл кэтэспит ыра санаалара туолан, Саха АССР норуодунай артыыһа Афанасий Егорович Ефремов аатынан саҥа култуура дьиэтин үөрүүлээх аһыллыыта өрө көтөҕүллүүлээхтик ыытылынна.
Бу эрэ иннинэ Тумуллааҕы култуура киинин туппут «Стройкомплектсервис» ХЭТ салайааччыта Руслан Трофимов символическэй күлүүһү Хочотооҕу саҥа култуура киинин дириэктэригэр Надежда Слепцоваҕа туттарда. Улуус баһылыга Николай Старостин, Ил Түмэн сис кэмитиэтин бэрэссэдээтэлэ Юрий Баишев, «Мин Сахам сирэ ‒ XXI үйэҕэ» үтүө дьыала хамсааһынын төрүттээбит Иван Емельянов, «2-с Наахара нэһилиэгэ» МТ баһылыга Петр Никитин, киин дириэктэрэ Надежда Слепцова уонна Афанасий Ефремов бииргэ төрөөбүт быраата, 2-с Наахара нэһилиэгин Бочуоттаах гражданина Николай Ефремов аалай лиэнтэни быстылар. Кэлбит ыалдьыттар эҕэрдэлэрин анаатылар, Бочуотунай грамоталары, Махтал суруктары үлэлэспит тутааччыларга туттартаатылар.
«Мин Сахам сирэ XXI үйэҕэ» үтүө дьыала хамсааһын 17 сыл үлэлиирин тухары өрөспүүбүлүкэ үрдүнэн тыһыынчаттан тахса тутуу эбийиэктэрэ үлэҕэ киллэриллибиттэрэ. Итинтэн хайа да улуустан саамай элбэх дьиэ биһиги улууспутугар тутуллубута. Бу бырагырааманан Хочоҕо элбэх хайысхалаах култуура киинин таһынан түөрт сыллааҕыта саҥа балыыһа тутуллан, күн бүгүн үлэлии турар. Түөрт сыл иһигэр ситэриллэн-хоторуллан сахалыы тыыннаах улахан куупаллаах уораҕайы Иван Емельянов 1995 сыллаахха бырайыактаабыт. Олохтоохтор норуот күүһүнэн субуотунньукка элбэхтик үлэлэспиттэр, биирдиилээн да дьон, биир дойдулаахтар эмискэ кылааттарын киллэрсибиттэр, «Алгыстаах айан» хамсааһын салайааччыта, норуот эмчитэ, норуот медицинатын магистра Александра Егорова 100 тыһыынча солкуобайынан көмөлөспүт.
Улуус култуураҕа уонна духуобунай сайдыыга управлениетын начаалынньыга Сергей Холмогоров быйыл Саха АССР норуодунай артыыһа Афанасий Ефремов төрөөбүтэ 100 сылын баттаһа саҥа култуура киинэ дьэндэтиллибитин эттэ итиэннэ «Биир ньыгыл Россия» баартыйа аатыттан кириэһилэлэри, уоту-күөһү, аппаратураны, миэбэли ылыыга 1 мөлүйүөн 725 тыһыынча солкуобай суумалаах сэртипикээти, СӨ Бырабыыталыстыбатын Махтал суругун култуура киинин дириэктэригэр Надежда Слепцоваҕа, СӨ Култуураҕа уонна духуобунай сайдыыга министиэристибэтин аатыттан Бочуоттаах грамоталары Наталья Никанороваҕа, Ирина Никанороваҕа уо.д.а. туттартаата.
Афанасий Ефремов бииргэ төрөөбүт быраата, нэһилиэк Бочуоттаах гражданина Николай Ефремов уонна Дьокуускайтан төрөппүт кыыһа быраас идэлээх Надежда Алексеева махтал тылларын эттилэр, Надежда Афанасьевна аҕата тыйаатырга күннэтэ туттубут гириимин холбукатын, уруһуйдарын эскиистэрин, кини туһунан матырыйааллары бэлэх уунна.
СӨ норуодунай артыыската Марфа Колесова‒Расторгуева кэргэнэ, Саха Цииркэтин төрүттээччи Сергей Расторгуев Марфа Петровна төрөөбүт күнүгэр, муус устар 3 күнүгэр бу сыанаҕа Саха цииркэтин кэлэктиибэ кэнсиэр бэлэхтиэҕэ диэн үөрүүлээх сонуну иһитиннэрдэ.
2-с Наахара нэһилиэгин Ытык ыала Фекла, Петр Колесовтар оҕолоро уонна нэһилиэккэ ааҕар балаҕаны төрүттээбит Гаврил Платонов оҕолоро эҕэрдэ тыл бастыҥын эттилэр, байаан доҕуһуоллаах ыллаатылар-туойдулар. «1-Наахара нэһилиэгэ» МТ баһылыга, хочолор биир дойдулаахтара Алексей Григорьев бу күн нэһилиэктэн төрүттээхтэргэ Любовь Борисоваҕа уонна Виктор Захаровка кыһыл көмүс анал бэлиэлэри туттартаата. Мустубут дьону Марфа Колесова-Расторгуева аатынан «Дьэргэлгэн» оҕо вокальнай ансаамбылын иитиллээччилэрэ эҕэрдэлээтилэр.
Бу күн култуура уонна успуорт 62-с эстэпиэтэтин чэрчитинэн Алтан нэһилиэгиттэн кыттааччылар муусуканан испэктээктэрин саҥа сыанаҕа туруордулар.