Бүлүүтээҕи “Сыа Бүлүү” кэпэрэтиип 2017 сыллааҕы түмүктэрин таһаарда

149

“Сыа Бүлүү” астыыр-үөллүүр, соҕотуопкалыыр тыа хаһаайыстыбатын кэпэрэтиибин сыллааҕы уопсай мунньахтара буолла. Манна ааспыт сыл түмүктэрэ бигэргэтилиннэ, быйылгы былаан ылылынна, кооператив салалтата талылынна.


Улууска ыаммыт үүт үксэ “Сыа Бүлүү” кэпэрэтиипкэ туттарыллар. Ол кэннэ нэһилиэктэргэ баар сыахтарга арыы оҥоһуллар. Онтон куораттааҕы үүт собуотун кыһынын Чочутааҕы “Ампаардаах” сүөһү комплекса, сайынын Чинэкэ уонна Чочу сайылыктара үүтүнэн хааччыйаллар. Онон кэпэрэтиип таһаарыылаах үлэтин түмүгэр олохтоохтор төгүрүк сылы быһа үрүҥ ас арааһын хамаҕатык ылаллар.

Дириэктэр А.А.Кондратьев мунньахха билиһиннэрбитинэн, кэпэрэтиип 2017 сылы эриэ-дэхси түмүктээбит.

Кэпэрэтиип 3,9 тыһ. т үүт туппут, итинтэн 131 т ынах арыыта, 912 т үрүҥ ас оҥоһуллубут. Үүт туттарааччыларга 175,6 мөл. солк, ол иһигэр 134 мөл солк. субсидия харчыта төлөммүт. 2017 сыллаахха хаһааҥҥытааҕар да элбэх — 46,2 т эт туттарыллыбыт, онтон 39 т ынах этэ. Итини тэҥэ 3,2 т сылгы этэ, 3,4 убаһа этэ. Өкүндү сүөһү астыыр пуунугар 124 субай сүөһү төлөһүтүллэн, 15,2 т эт туттарыллыбытын ахтыахха сөп.

Министиэристибэ, кэпэрэтиип үптэринэн сайынын 20 кыраадыс тымныыны тутар 650 куб. м иэннээх булуус тутуута түмүктэнэн эрэр.

Былырыын Үгүлээккэ, II Күүлэккэ, Тылгыныга, Тааһаҕарга баар арыы сыахтарын сорох тэриллэрин уларытан өрөмүөн үлэтэ ыытыллыбыта отчуокка ахтылынна.

Тэрилтэ үбүн туругун билиһиннэрдэххэ, 2017 сылы “Сыа Бүлүү” 686 тыһ. солк. барыстаах түмүктээбит. Уопсай баай-дуол, сүрүн сириэстибэ, хапытаал, эбэһээтилистибэлэр 223 мөл. солк. тэҥнэспиттэр, ол иһигэр 15,6 мөл. солк. иэс киирэ сылдьар.

“Сыа Бүлүү” оҥорор аһа-үөлэ таһымнаах быыстапкаларга сэҥээриини ылар. Кэпэрэтиип йогурта былырыын Саха сиринээҕи агропромышленнай быыстапкаҕа бастакы степеннээх дипломунан наҕараадаламмыт буоллаҕына, суората “Россия 100 бастыҥ табаара” эрэгийиэннээҕи куонкурска бастыҥ табаар быһыытынан бэлиэтэммит.

Быйылгы былааннары билиһиннэрдэххэ, Бүлүү улууһун хаһаайыстыбалара “Сыа Бүлүү” кэпэрэтиипкэ 4 тыһ. т үүтү, 39 т эти, 5 т балыгы, 3 т отону туттарыахтаахтар, 120 субай сүөһү уотууга туруоруллуохтаах, 128 т арыы, 986 т үүт аһылык, 500 тыһ. т литр ыраас уу, 12 т эт оҥоһук оҥоһуллуохтаах.

Дьүүллэһии кэннэ кэпэрэтиип кыттыылаахтара былырыыҥҥы сыллааҕы үлэни, быйылгы былааннары бигэргэттилэр, кэпэрэтиип Кэтээн көрөр Сэбиэтин, бырабылыанньатын таллылар. 8 сыллааҕыта улуус баһылыгын солбуйааччытыттан кэпэрэтиипкэ үлэлии кэлбит А.А.Кондратьев кэлэр 5 сыл болдьоххо дириэктэринэн биир санаанан хаттаан талыллыбытын бэлиэтиэххэ сөп.

Мунньах кыттыылаахтара үрүҥ аһы астыыр кыахтаах арыы сыахтарын саҥардыыга, сыл бүтүүтэ туттарыллар үүт харчытын төлөһүүгэ, тоҥорор тэриллэри өрөмүөннүүр, оборудование таҥар идэлээх үлэһиттэри үлэлэтиигэ, Мастаах түөлбэтигэр сүөһү астыыр пууну тутууга уо.д.а. этии киллэрбиттэрэ болҕомтоҕо ылыллыа диэн эрэниэххэ.