Ыам ыйын 1 күнүгэр төһө да хаардаан, самыырдаан ыллар, Күөх Маайы уруйдуур-айхаллыыр үөрүүлээх тэрээһин Майа сэлиэнньэтигэр өрө көтөҕүллүүлээхтик ааста. Дьэрэкээнник симэммит тэрилтэлэр үлэһит дьоно параакка хаамсаннар, Майа киин уулуссаларын киэргэттилэр.
«Бастыҥ холуонна» аатын быйыл В.П.Ларионов аатынан Майа орто оскуолатын кэлэктиибэ сүктэ. Сахалыы таҥастаах, чорооннору өрө көтөхпүт эдэр учууталлар, үрдүкү кылаас үөрэнээччилэрэ элбэх киһини сөхтөрдүлэр. Оскуола кэлэктиибигэр улуус баһылыга Николай Старостин 20 тыһыынча солкуобайдаах сэртипикээти туттарда. «Майа сэлиэнньэтэ» МТ баһылыга Тимофей Нестеров параакка бэлэмнээхтик уонна көхтөөхтүк кыттыбыт бастыҥ тэрилтэлэри: улуустааҕы култуура уонна духуобунай сайдыы управлениетын, «Россия почтата» тэрилтэни уонна үөрэх управлениетын кэлэктииптэрин наҕараадалаата. Олохтоохтору оройуон Сэбиэтин бэрэссэдээтэлэ Андрей Находкин, үөрэҕирии үлэһиттэрин боропсойууһун бэрэссэдээтэлэ Степан Андреев уонна доруобуйа харыстабылын үлэһиттэрин бэрэссэдээтэлэ Зинаида Ксенофонтова о.д.а. эҕэрдэлээтилэр.
Бу күн ырыа-тойук, үҥкүү-битии, көр-нар көҕүлүттэн тутулунна. Бырааһынньык чаҕылхай түгэнинэн «Манчаары» стадиоҥҥа улуустааҕы «Эркээйи» хаһыат бирииһигэр үгэскэ кубулуйбут чэпчэки атлетикаҕа ыһыылаах-хаһыылаах эстэпиэтэ ыытыллыбыта буолла.