Тааттатааҕы «Эрчим» цирковой студия саҥа көлүөнэтэ Сергей Расторгуевтан диплом тутта

345

Саха Өрөспүүбүлүкэтигэр кыра оҕону цирковой искусствоҕа дьарыктааһын 90-с сыллар ортолоруттан саҕаламмыта. Таатта улууһугар 1998-1999 сс. энтузиаст-уһуйааччы Иван Табунанов бастакы дьарыктарын Ытык Күөлгэ саҕалаабыта. Онно дьарыктаммыт оҕолортон хас да оҕо Кытайга үөрэтии бастакы түһүмэҕэр баран бу уустук искусство дьарыгын баһылаабыттара.


Иван Табунанов цирковой искусствоҕа дьарыктаабыт оҕолорун сорохторо билигин Саха циркэтин сүрүн артыыстара буолан уһуйааччыларын аатын ааттата сылдьаллар.

Иван Егорович кэнники сылларга тус баҕатынан, кэнчээри ыччаттарга туһа буолуо этэ диэн Ытык Күөлүнэн, Дьохсоҕонунан, Чөркөөҕүнэн сылдьан оҕолору дьарыктыыр. Оҕолор хас биирдии дьарыкка кыһаллан, кини тугу эппитин, хамсанарга үөрэппитин дьиэлэригэр утумнаахтык хатылыыллар, куруутун формаларыгар сылдьарга дьулуһаллар. Онуоха төрөппүттэр оҕолоро сайдарын туһугар тэҥҥэ кыһаллаллар.

Быйыл студияҕа Чөркөөхтөн 1-6 кылаас үөрэнээччилэрэ 4 кыыс, 5 уол, Дьохсоҕонтон орто кылаастартан 2 кыыс, Ытык Күөлтэн 1,2 №дээх орто оскуолалар үөрэнээччилэрэ 5 кыыс хаһыс да сылларын дьарыктаналлар. 2017 сыл ахсынньы саҥатыгар Ытык Күөл бастакы нүөмэрдээх орто оскуолатын 7-с кылааһын үөрэнээччитэ Арианна Санникова Кытайга цирковой оскуолаҕа үөрэнэ барбыта. Саха оҕолоругар онно математика, физика уонна информатика учууталынан, иитээччинэн эбии үөрэхтээһин уопуттаах педагога, Тааттаттан төрүттээх биир дойдулаахпыт Римма Иннокентьевна Баишева үлэлии сылдьар.

Быйылгы үөрэх дьылыгар цирковой студия өссө биир саҥа көлүөнэ иитиллээччилэрдээх буолла. Ол курдук «Кэнчээри» оҕону сайыннарар киин-оҕо саадын 3 кыыһа: биэс саастаах Юлиана Петрова, 7 саастаах Валерия Осипова уонна Виолетта Иннокентьева каучук «Рысь» диэн нүөмэринэн Чурапчы улууһун Мугудайыгар ыытыллыбыт оҕолорго аналлаах цирковой искусство өрөспүүбүлүкэтээҕи 9-с куонкуруһугар кыттан, бастакы истиэпэннээх дипломунан наҕараадаланнылар.

Кыргыттар РФ, СӨ үтүөлээх артыыһа, Саха бриллиантовай циркэтин дириэктэрэ уонна уус-уран салайааччыта Сергей Васильевич Расторгуев илии баттааһыннаах диплому ыланнар үөрдүлэр. Бу туһунан студия уһуйааччыта Иван Егорович үөрэн, астынан туран кэпсээтэ.