саҥа дьиэ — Архив новостей

Хатыҥ Арыыга тулаайах уонна төрөппүт көрүүтэ-истиитэ суох хаалбыт 14 оҕоҕо дьиэ күлүүһүн туттардылар

Нам улууһун Хатыҥ-Арыы нэһилиэгэр «Озернай» кыбаарталга “Тулаайах уонна төрөппүт көрүүтэ-истиитэ суох хаалбыт оҕолору дьиэнэн хааччыйыы” республикатааҕы программа чэрчитинэ тутуллубут 14 дьиэ күлүүһүн тустаахтарга туттардылар.

13-16 суотай уһаайбалаах, толору хааччыллыылаах, 48 кв.м. иэннээх, дьиэлэри «Диамантер» ХЭТ бэдэрээтчиктээн (ген. дир. А.Т. Захаров) туппут.

Бу дьиэлэри тутууга 2017 сылга 22 мөл. 402 тыһ. 872 солк. көрүллэн, оҕолорго үтүө бэлэх буолла. Иэримэ дьиэ аһыллыытын үөрүүлээх түгэнигэр үтүө үгэһинэн аал уоту оттон, сахалыы сиэринэн-туомунан, оҕолор этэҥҥэ олороллоругар үрдүк айыыларга алгысчыт Петр Охлопков сүгүрүйдэ.

Саҥа дьиэлэр аһыллыыларын бэлиэтиир аалай кыһыл лиэнтэни Нам улууһун баһылыгын тутууга уонна олох-дьаһах коммунальнай хаһаайыстыбатыгар солбуйааччы Степан Матвеев, опека уонна попечительство отделын салайааччытын э.т. Анастасия Сивцева, Хатыҥ Арыы нэһилиэгин баһылыга Юрий Слепцов, «Диамантер» ХЭТ генеральнай директора Альберт Захаров уонна саҥа дьиэ хаһаайына Олег Стручков быстылар.

Оҕолор дьиэлэрэ куруутун сылаас, сырдык буоларыгар, көрөн-харайан олороллоругар, уһаайбаларыгар оҕуруот аһын олордоллоругар, иллээх буолалларыгар баҕаран туран, улуус баһылыгын солбуйааччы Степан Степанович Матвеев оҕолорго күлүүстэри туттарда. Дьиэлэри ылбыт оҕолор ааттарыттан Люба Попова Саха Өрөспүүбүлүкэтин салалтатыгар, улуус дьаһалтатыгар, опека уонна попечительство отделыгар, дьиэни туппут тэрилтэҕэ, Хатыҥ Арыы баһылыгар ис сүрэхтэрин махтаналларын биллэрдэ. «Озернай» кварталга бу 14 дьиэни Хатыҥ Арыыттан, Намтан, Хамаҕаттаттан, Түбэттэн, Таастаахтан, Искраттан, 2 Хомустаахтан төрүттээх оҕолор ыллылар. Онон бу нэһилиэктэр баһылыктара оҕолор үөрүүлэрин тэҥҥэ үллэстэн бэйэлэрин эҕэрдэлэрин эттилэр уонна сэмэй бэлэхтэри туттардылар.

Нам улууһун Хатыҥ Арыы нэһилиэгин Аппаанытыгар «Тыа сирин бигэ туруктаахтык сайыннарыы» диэн федеральнай программа чэрчитинэн «Озернай» квартал тэриллибитэ. Бу тус сыаллаах федеральнай программанан 455 учаастак түҥэтиллэн, саҥа дьиэлэр дьэндэһэн көрүөхтэн үчүгэй кыбаартал буолан турар. Онтон 21 учаастак тулаайах уонна төрөппүт көрүүтэ-истиитэ суох хаалбыт оҕолорго анаммыт. Озернайга уот, күөх төлөн, сайыҥҥы уу ситимэ тардыллан, инженернэй инфраструктура толору оҥоһуллан турар, онон оҕолор олороллоругар толору усулуобуйа баар буолла. Аны сайын бу кварталга эбии сэттэ оҕоҕо дьиэ күлүүһүн туттарыахтара.

Тараҕай нэһилиэгэр оҕо ускуустубатын оскуолатын саҥа дьиэтэ дьэндэйиэҕэ

Тараҕай нэһилиэгэр улууска биир бастыҥ үлэлээх-хамнастаах, 120 оҕону хабан дьарыктыыр оҕо ускуустубатын оскуолатын саҥа дьиэтин акылаатын түһэриллиитин үөрүүлээх тэрээһинэ буолла.

СӨ култуураҕа үтүөлээх үлэһитэ, РФ үөрэҕириигэ туйгуна, улуус Бочуоттаах гражданина, табаҕалары «табаҕалар» дэтэр «Төлөн» эр дьон норуодунай ансаамбылын төрүттээбит, Табаҕатааҕы оҕо ускуустубатын оскуолатыгар 1989 сыллаахтан салайааччынан таһаарыылаахтык үлэлии-хамсыы сылдьар Павел Егоров күн-бүгүн оҕолор хайдах усулуобуйаҕа үөрэнэ сылдьалларын кэпсээтэ:

‒ Куруук эргэ дьиэлэргэ үлэлээн кэллибит. Билигин үлэлии олорор сирбит эмиэ, көрөргүт курдук, олус эргэрдэ. Төһө да сыллата өрөмүөн бөҕө ыытылларын үрдүнэн, сирэ аллара бара турар, тас сыбаҕа түһүтэлээн эрэр, истиэнэтэ онон-манан хайыта барыталаата, ааннара хаадьаҥнаан-иэдьэҥнээн аһыллыбат-сабыллыбат буоллулар. Дьон доруобуйатыгар кутталлаах сиик тэллэйэ тахсар буолан, хаарбах туруктаах дьиэ ахсааныгар киирдэ. Ол иһин өр сылларга туруорсан саҥа оскуоланы көрдөһөбүт.

Саҥа таас музыкальнай оскуола акылаатын түһэриигэ Майаттан тутааччы предприниматель Константин Попов биригээдэтэ үлэлээбит. Оскуола 350 квадратнай миэтэрэлээх, анал кылаастардаах, аактабай саалалаах буолара былааннанар.
Улуустааҕы тутуу управлениетын салайааччыта Александр Куличкин эһиилгиттэн оскуола уопсай тутуута саҕаланыахтааҕын туһунан иһитиннэрдэ. Улуустааҕы култуура уонна духуобунай сайдыы управлениетын начаалынньыгын солбуйааччы Надежда Максимова саҥа оскуола тутуллуута туох да харгыһы көрсүбэккэ, үбэ-харчыта тып-тап курдук көрүллэн иһэригэр баҕа санаатын эттэ, М.К.Попова аатынан Майатааҕы оҕо ускуустубатын оскуолатын дириэктэрэ Василий Захаров кэллиэгэлэрин эҕэрдэлии кэлбит. Дьиэ акылаата чиҥ-үйэлээх буоллун диэн «Тараҕай нэһилиэгэ» МТ баһылыга Гаврил Бурнашев эттэ.

Оҕо усксуутубатын оскуолатын дириэктэрэ Павел Егоров уонна эдэр үлэһит Ксения Шамаева аал уоту оттон Үрдүкү Айыылартан көрдөстүлэр. Оскуола үөрэнээччилэрэ, төрөппүттэр оһуокайы оройуттан туттулар, эҕэрдэ кэнсиэр көрдөрдүлэр.

Булуҥ улууһун Таймылыырыгар нэһилиэнньэҕэ анаан баанньык туталлар

Таймылыырга быйыл икки чааһынай дьиэ тутулла турар. Хаһаайыттар күһүн малааһынныыр былааннаах, үлэ үгэнигэр сылдьаллар. Тутуу хайысхатыгар өссө биир үөрүүлээх сонунунан нэһилиэк баанньыгын тутуута буолар. Үлэҕэ киллэрэр санаалаахтар.

Икки кыра оҕолоох Тамара, Владимир Павловтар диэн эдэр ыал биирдиилээн дьиэни тутуу бырагырааматынан 2013 сылтан тутууларын саҕалаабыттара. Күһүн саҥа дьиэлэригэр киирэр былааннаахтар. Хоту дойдуга, ыарахан суоллаах-иистээх сиргэ, олохтоох дьаһалта дьон туһугар олус кыһаллар. Эдэр баһылык Афанасий Андросовка Павловтар махталлара улахан.

Иккис олорор дьиэни олохтоох дьаһалта бэйэтин күүһүнэн тыыл, үлэ ветераннарыгар Павлов Федор Егорович уонна Григорьева Пелагея Васильевна дьиэ кэргэннэригэр анаан тутта. Сотору кэминэн күлүүс туттарыллыахтаах.

Үһүс тутуу социальнай обьект буолар. Нэһилиэк баанньыгын дьиэтэ былырыын сыбаайата түспүтэ. Билигин биэс киһилээх биригээдэ үлэлиир. Артур Владимирович Скрыбыкин, Александр Анатольевич Прибылых, Борис Борисович Алексеев, Александр Андреевич Черемисин, Владимир Аркадьевич Варламов туталлар. Тутуу матырыйаала куораттан тиэллэн кэлбит.