Метка: цифровой телевидение

Эбээн Бытантайга цифровой телевидение холбонно

Эбээн Бытантай улууһун киинигэр Баатаҕай Алыытыгар 10 ханааллаах цифровой телевидение үлэҕэ киирдэ. Ахсынньы аам-даам тымныыта төһө да сатыылаан турдар, информация, сырдатар-иһитиннэрэр сириэстибэ сайдыытыгар сүҥкэн суолталаах үөрүүлээх арыллыыга дьон бөҕө муһунна.

Үөрүүлээх күҥҥэ эбээлэр «Үпэндьэл» бөлөхтөрө эбээннии сиэринэн-туомунан аал уоту оттон, айах тутан күндүлээтилэр. Улуус баһылыга Иван Горохов, Түгэһиир нэһилиэгин баһылыга Егор Васильев, сибээс инженера Павел Попов үөрүүлээх быһыыга-майгыга кыһыл лиэнтэни быстылар.

Кэлэр 2018 сылга өссө 10 ханаал эбиллэн, уопсайа 20 ханаалы олохтоохтор босхо көрөр кыахтаныахтара.

Муомаҕа цифровой телевидение холбонно

Кэнники сылларга олохпутугар сибээс араас өҥөтө киирэн, сайдыы балысханнык барар. Улууска Мегафон, МТС, Билайн хампаанньалара холбоммуттара. РФ президенэ В.В. Путин дойду үрдүнэн аны цифровой технологияны күүскэ сайыннарар туһунан боппуруоһу көтөхпүтэ. Ол соруга туолан, Муомаҕа бу күннэргэ цифровой телевидение холбонно.

Бу соторутааҕыта Муома улууһугар цифровой телевидение холбонно. Сонун дьаһал олохтоохтору үөртэ.

«Российская телерадиосеть» тэрилтэ Уһук Илиннээҕи филиалын үлэһитэ Данил Николаев:

— Үлэ анал кыраапыгынан кэмигэр киирдэр ханнык диэн үлэлэһэбит. Саха сиригэр барыта 160 анал станция туруорулунна, онон 210 нэһилиэнньэлээх пууну цифровой ханаалынан хааччыйдыбыт. Манна үлэни Хабаровскайтан «Восточная строительная компания» ХЭТ үлэһиттэрэ сүрүннээн 35 м вышканы туруордулар, киэһэ хойукка диэри сыбаарка үлэтин ыытан, билигин тас өттүн күрүөтүн оҥордулар. Вышката үрдүк, 10 км тиийэ радиустаах сири хабан, Хонууттан чугас Суон Тиит учаастагын уонна Буор Сыһыы нэһилиэгин олохтоохторо бу сибээһинэн туһаныахтара. 10 ханаал босхо көстөр. Эһиилтэн эһиил өссө эбии 10 ханаалы, иккис мультиплексы аҕалан холбуохпут. Оччотугар барыта 20 российскай ханаалы буор-босхо көрүөххүт. Билигин өссө үһүс мультиплексы туруорар туһунан үрдүкү таһымҥа кэпсэтии барар.

Бу ханааллары аныгылыы оҥоһуулаах кэнники көлүөнэ телевизордарга эрэ көрүөххэ сөп, онно анал программалаах. Билигин дьон үксүлэрэ урукку сыллардааҕы телевизордаахтар. Кинилэргэ DVB-T2 анал приемник-приставка ылалларыгар исписэлиистэр сүбэлииллэр.

Анаабыр Үрүҥ Хайатыгар цифровой телевидение киллэриллэр

Анаабыр оройуонун Үрүҥ Хайатын олохтоохторо цифровой телевидениены көрөр кыахтанныбыт. Долганнар түөлбэлээн олорор нэһилиэктэригэр сонун уларыйыы буолла.

Балаҕан ыйын 9 күнүгэр нэһилиэккэ цифровой телевидениены киллэрии түмүктүүр үлэлэрэ саҕаланнылар. Дьокуускай куораттан таҥар биригээдэ кэлэн иилээн-саҕалаан ыыта сылдьар. Биригээдэни Неустроев Александр Петрович диэн эдэр киһи салайар. Кини эппитинэн, нэhилиэккэ 10 цифровой ханаал үлэлиэҕэ, эбии 10 ханаал киирэрэ былааннанар.

Бу бэлиэ түгэни үйэтитэн нэһилиэк баhылыга К.У. Алькенов, баһылык солбуйааччыта В.В. Спиридонов, «Хэйро» культурнай киин директора С.В. Сыроватскай уонна мин буоламмыт хаартыскаҕа түhэрдибит, үлэhиттэрдиин кэпсэттибит.