Дьокуускай куоракка бу нэдиэлэҕэ уопсастыбаннай-политическай деятель Исиидэр Бараахап төрөөбүтэ 120 сылыгар аналлааах тэрээһиннэр чэрчилэринэн, Үөһээ Бүлүү улууһун дэлэгээссийэтэ Дьокуускайдааҕы тыа хаһаайыстыбатын академиятыгар сырытта.
Көрсүһүү кэмигэр Тыа хаһаайыстыбатын академиятыгар Исиидэр Бараахап аатын иҥэрии боппуруоһа турда. Манна улуус баһылыга Владимир Поскачин уонна академия ректора Иван Слепцов биир толкуйдаахтар, санаалаахтар. Онон ити боппуруос олоххо киирэригэр биир тиһиктээх үлэ ыытыллыаҕа диэн быһаарыстылар.
Академия ректора Иван Слепцов: «Академия аҥардас тыа хаһаайыстыбатын идэлэрин эрэ буолбакка, тыа сиригэр наадалаах, көдьүүстээх исписэлиистэри үөрэтэр. Бу түмүгэр саҥа лицензия ыллыбыт», — диэн кэпсээтэ.
Онон саҥа факультеттар аһыллыахтарын иһитиннэрдэ. Бу күннэргэ ойуур комплексын уонна сир (землеустройство) факультеттара баар буолуохтарын эттэ.
Үөһээ Бүлүү улууһун баһылыга Владимир Поскачин ааспыт сыл сэтинньитигэр улууһу уонна академияны кытта бииргэ үлэлээһиҥҥэ сөбүлэһии чэрчитинэн, сөптөөх үлэ ыытылларын бэлиэтээн эттэ. Бүгүҥҥү тэрээһиҥҥэ улуус нэһилиэктэрин баһылыктара эдэр учуонайдары кытта көрүстүлэр, академия факультеттарын, үөрэтэр куорпустарын көрдүлэр.
Валерий Васильев, Үөһээ Бүлүү улууһун Үөдүгэй нэһилиэгин баһылыга:
— Элбэх оҕолоох дьиэ кэргэнтэн үөрэнэр устудьуоннары туох кыалларынан өҋүүргүтүн иһин академия салалтатыгар улахан махтал. Уопсайдарга сылдьан Үөһээ Бүлүүттэн үөрэнэр устудьуоннар хайдах олороллорун, үөрэнэллэрин билистим. Сөптөөх толору усулуобуйа баар.