Дьокуускай куоракка Модун спортивнай киин дьиэтигэр кулун тутар 13 күнүгэр СР үтүөлээх тренерэ, хотугу многоборьеҕа РФ спордун маастара, СР үөрэҕириитин туйгуна, РФ уопсай үөрэхтээһинин бочуоттаах үлэһитэ, «Сахаада-спорт» ассоциация лауреата, «Азия оҕолоро» фонда стипендиата, Анаабыр улууһун киэн туттар киһитэ Константин Николаевич Туприн аатынан республикатааҕы турнир аһыллыыта буолла.
Хотугу многоборьеҕа илин-кэлин түсүһэ Алдан, Анаабыр, Булуҥ, Эдьигээн, Үөһээ Бүлүү, Мэҥэ Хаҥалас, Нам, Нерюнгри, Өлүөхүмэ, Өлөөн, Орто Халыма, Томпо, Хаҥалас улуустарыттан уонна Дьокуускай куорат хамаандалара кэлбиттэр.
Турнир үөрүүлээх аһыллыытыгар Ил Түмэн депутата Баһылай Манчаары аатынан саха национальнай спортивнай көрүҥнэрин киинин дириэктэрэ Григорьев И.Ю., Анаабыр улууһун МТ баһылыга Семенов И.И., Үрүҥ Хайа МТ баһылыга Алькенов К.У., аймахтара Туприн С.Е., Туприн С.В., Туприна А.В., Кляус А.С., бииргэ үлэлээбит дьоно Сыромятников А.Г., Протодьяконов С.П., «Хоту дойду чулуу уола» кинигэ автора Туприна Н.П., иитиллээччилэрэ Туприн К.А., Неустроева С.В., Туприн В.Л., Кляус Л.И., уо.д.а. эҕэрдэ тыл эттилэр.
Бэлиэ тэрээһиҥҥэ Константин Туприн кэргэнэ Сардана Семенова кыттыыны ылла. Кини Анаабыр улууһа ыччакка холобур буолар тэрээһини ыытарыгар улахан махталын этэн туран, уолларын Айтал Туприн аатыттан күрэхтэһии саамай эдэр кыттыылааҕар анал бирииһи туруоралларын иһитиннэрдэ.
Турнир аһыллыытын Сааскылаахтан кэлбит «Тэбэй» вокальнай ансаамбыл (салайааччы Туприна С.С.), «Анаабыр алмаастара» оҕо образцовай фольклорнай үҥкүү ансаамбыла (салайааччы Спиридонова Я.Н.), Константин Туприн «Туундараҕа таба күнэ» ырыанан киэргэттилэр. Күрэхтэһии кыттыылаахтарын дойдуларыттан аҕалбыт сибиэһэй тоҥ балыгынан күндүлээтилэр.
Бу бэлиэ түгэни мүччү туппакка, Үрүҥ Хайа орто оскуолатын хотугу многоборьеҕа дьарыктыыр тренерин, физкультура учуутала Сааскылаана Кылтасова: «Биһиги Сааскылаахтан кулун тутар 2 күнүгэр тохсуо буолан кэлбиппит уонна сайын буолуохтаах «Манчаары оонньууларыгар» сүүмэрдиир күрэхтэһиилэргэ кытынныбыт. Элеонора Туприна, Никита Туприн оонньууга кыттар путевка ыланнар олус үөрдүбүт. Турнирга Анаабыртан кэлэн үөрэнэ сылдьар 15 студент кытынна«.
Оҕо спортивнай оскуолатын директора Платонова М.В. чулуу спортсмен, хотугу многоборьеҕа элбэх спорт маастарын иитэн таһаарбыт, дэгиттэр талааннаах тренер Константин Туприн аатын үйэтитэр турниры Анаабыр улууһа үбүлээн, иилээн-саҕалаан ыыппытын туһунан кэпсээтэ. «Бириис фондата 200 тыһыынча солкуобай. Быйылгы турнирга элбэх улуус кытта кэлбитэ хайҕаллаах. Хотугу многоборьены республикаҕа киэҥник тарҕатар сыалтан Туприн К.Н. аатынан республикатааҕы чемпионат оҥотторуохпутун баҕарабыт«, — диэтэ кини.
