Метка: уол оҕону иитии

Таатта уолаттара «Ыллаа-туой, уол оҕо!» күрэххэ бэйэлэрин талааннарын көрдөрдүлэр

«Эрчим» уоланнар айар түһүлгэлэрэ Таатта улууһугар 2007 сылтан ыытыллар. Олоҥхоһуттар уутуйан төрөөбүт-үөскээбит сирдэригэр Дьүлэй нэһилиэгэр ыытылларынан уратылаах. Этэргэ дылы, киһи үс куттаах буоллаҕына, бу оскуолаҕа ийэ куту кэрэһэлиир туйгун уонна бастыҥ үөрэхтээх уолаттар, кыргыттар да элбии туралларын туһугар сорох предметтэри дириҥэтэн үөрэтэллэр.

Билигин бу кэскиллээх тэрээһини уһуннук Туора Күөл орто оскуолатын директорын эбээһинэһин толорооччу Оксана Николаевна Гуляева ис сүрэҕиттэн салайар. Оскуола салалтата, учууталлара, төрөппүттэр оҕо ситиһиитин тиритэн, хара күүһүнэн ылан, онтон үөрэр, астынар, киэн туттар бэрээдэгин кыһаллан туран тэрийэллэр.

Бу сырыыга улуус 14 оскуолатыттан 152 кыттааччы кэлэн айар талааннарын, дьоҕурдарын хоһооҥҥо, дьүһүйүүгэ, ырыаҕа, астааһыҥҥа астына, дуоһуйа көрдөрөн, үөрэн-көтөн тарҕастылар.

«Ыллаа-туой, уол оҕо!» ырыа күрэһигэр 74 уол кытынна.

Ырыаҕа быйылгы күрэстэһиигэ элбэх солистар, бөлөхтөр да ыллаатылар. Бары да эгил-тэгил бэртээхэй бэлэмнээх кэлбиттэрэ, учууталлар кыһаллыбыттарын бэлиэтиир.

Сиэннэрин ырыа, музыка, уус-уран тыл кэрэ эйгэтигэр киллэрэргэ ис сүрэҕиттэн кыһаллан үлэлэһэр, бэйэтэ ветеринар идэлээх, айылҕаттан ырыаһыт, элбэх оҕо ийэтэ, эбэтэ, хос эбэтэ, Туора Күөл олохтооҕо Анна Ивановна Кузьмина бу сырыыга сиэнин Кузьма Кузьмины дьарыктаан аҕалбыт. Урукку өттүгэр уончалыы сыл дьарыктаабыт сиэннэрэ Николай, Егор, Родион Кузьминнар трионан тахсыылаахтык дьарыктанан, Гран-При хаһаайына буолбуттара. Билигин Николай Дьокуускайдааҕы культура уонна искусство коллеһын культурнай-маассабай мероприятелары тэрийээччи идэтин ылан, Саха госциркэтигэр үлэлиир. Егор Дьокуускайдааҕы музыкальнай училище народнай инструменнарга салаатын балалайка идэтигэр ситиһиилээхтик үөрэнэ сылдьар. Родион эмиэ бу училище вокальнай салаатын иккис курсун кэнниттэн армияҕа сулууспалыы сылдьар. Онон, Эбээ Аана дьарыктаабыта таах хаалбакка уолаттара идэтийиигэ үөрэнэллэриттэн, үлэлээн эрэллэриттэн кыттыгастаах буоламмыт үөрэбит эрэ. Бу уолаттар үһүөн наһаа да табыллан ыллыыллара, эчи, таҥастара-саптара үчүгэйэ, тутталлара-хапталлара, куоластара улаатан истэхтэрин аайы өссө тупсан, киэркэйэн иһэрэ. Николай 2017 сыллаахха Ытык Күөлгэ норуот айымньытын улуустааҕы киинигэр практикалана сылдьан табаарыһынаан Олесь Максимовтыын улуустааҕы «Икки сулус» ырыа күрэһигэр кыттан, «Гран-При» үрдүк ааты ылбыттара. Олесь билигин Чурапчытааҕы норуот айымньытын улуустааҕы киинигэр ситиһиилээхтик үлэлиир.

Быйылгы күрэскэ Тыараһа орто уонна коррекциялыыр оскуолаларыттан, Туора Күөлтэн, Тааттатааҕы лицейтэн ырыаһыт уолаттар элбэх буолан кэлбиттэр. Уопсайынан ылан көрдөххө, бу сырыыга кыттар уолаттары бэлэмнээһин таһыма быдан үрдээбит. Биир да таһыччы мөлтөх диэн суох. Оҕолор маннык кэрэ күрэскэ кыттыбыттарыттан астынан, үөрэн бардылар диэн түмүккэ кэллибит. Ити кинилэр ыллаабат да кэмнэригэр тутта-хапта да сылдьалларыгар харахха быраҕыллар.

Онон, улахан күрэстэһии түмүгэ бу курдук таҕыста. Күрэс чыпчаал кыайыылааҕынан, Гран-При улахан бириэмийэ хаһаайынынан Тааттатааҕы гимназия 7-с кылааһын үөрэнээччитэ Михаил Захаров буолуон буолла. Михаил былырыын эмиэ кыттыбыта. Онно да омуктуу ыллаан соһуппута. Быйыл да ол хайысхатын уларыппатах эрээри тыыныыга, артикуляцияҕа, туттан-хаптан, тональноһы сатаан тутууга, публиканы уонна бэйэ туругун дьүөрэлээһиҥҥэ үлэ балайда ыытыллыбыт. Онон кини жюри уонна көрөөччүлэр-истээччилэр үрдүкү сыанабылларын дьоһуннаахтык ылла.

Кыра кылаас уолаттарыгар лауреат үрдүк аатын Туора Күөл орто оскуолатыттан Кузьма Кузьмин ылла. Күрэскэ барыларыттан кыра саастаах Павлик Алексеев, эмиэ бу оскуолаттан, 1 истиэпэннээх дипломант буолла. 2-с истиэпэннээх дипломанынан Тааттатааҕы лицейтэн Женя Бехтюев ааттанна. Оттон 3-с истиэпэннээх дипломант аатын Даайа Амма орто оскуолатыттан Сандал Винокуров ылла.

Орто кылаас уолаттарыгар Тыараһа орто оскуолатыттан лауреат үрдүк аатыгар Коля Чехченнонов тигистэ. 1 истиэпэннээх дипломанынан Ытык Күөл 1№-дээх орто оскуолатыттан Саша Павлов, 2-с истиэпэннээх бастыҥ ырыаһыт аатын Тыараһа орто оскуолатыттан Вася Полускин ылла. 3-с истиэпэннээх диплом Туора Күөл орто оскуолатын үөрэнээччитигэр Афоня Белолюбскайга бэрилиннэ. Улахан кылаас уолаттарыгар лауреат аата Даайа Амма орто оскуолатын үөрэнээччитэ Олег Тимофеевка иҥэрилиннэ. 1 истиэпэннээх дипломант аатын бу күрэскэ хаһыс да сырыытын кыттар Тыараһа коррекционнай оскуолатын үөрэнээччитэ Валентин Постниковка иҥэрдибит. Валентин уруккутунааҕар чахчы тупсубут. Ырыа ис хоһоонун, мелодиятын, бэйэтин ис туругун көрөөччүгэ-истээччигэ олус үчүгэйдик, истиҥник тиэртэ. 2-с истиэпэннээх дипломанынан Уолба орто оскуолатыттан Саня Собакин буолла.

Күрэскэ икки дуэт кытынна. Лауреат үрдүк аатын Тыараһа орто оскуолатыттан Вася Полускин уонна Коля Чехченнонов дуэттара ылыан ылла. Бу уолаттар эчи тапсан ыллыыллара, толорор ырыаларын ис дууһаларыттан ылыналлара, үөрэллэрэ, астыналлара, көрөөччүнү бэйэлэрин эйгэлэригэр киллэрэллэрэ үчүгэйин! Даайа Амма орто оскуолатын уолаттарын квартета 1-кы, Чөркөөх орто оскуолатын уолаттарын квартета 2-с, Даайа Амма квинтета 3-с, Тыараһа ортот оскуолатын «Дьоҕур» квартета 3-с истиэпэннээх дипломаннар буоллулар.

Ансамбылларга лауреат аатын Туора Күөл орто оскуолатын «Тоҕус тойоттор» кыра уолаттарын бөлөҕө, Уолба орто оскуолатын «Уолбан» бөлөх улахаттара ыллылар. Бастакы истиэпэннээх дипломунан Тааттатааҕы лицей «Эйээрик», Туора Күөл орто оскуолатын «Тоҕус тойоттор» улахаттара, 2-с истиэпэннээх дипломунан Чымынаайы орто оскуолатын «Амма уоланнара» ансаамбыллар наҕараадаланнылар.

Күрэс анал ааттарыгар «Көрөөччүлэр биһирэбиллэрин» Валентин Постников ылла. Саамай кыра кыттааччы Павлик Алексеев, «20-с үйэ ырыаларын пропагандиһа» ааты Туора Күөл орто оскуолатын «Дорҕоон» ВИА-та, «Чуор куолас» ааты Саша Павлов, «Ыччат ырыатын бастыҥ толорооччу» Саня Собакин, «Патриотическай ырыаны бастыҥ толорооччу» «Уолбан» ансаамбыл, «Бастыҥ салайааччы» Сардана Дмитриевна Сивцева, Тааттатааҕы оҕо искусствотын оскуолатын вокалга преподавателэ.

Бүлүү улууһугар “Аҕа үөрэҕэ ” сонун бырайыак үлэлээн эрэр

Егор Дашевскай директордаах сааһын ситэ илик оҕолору реабилитациялыыр “Кэнчээри” киин уонна Юрий Тутукаров салайааччылаах “Бүлүү улууһун Аҕаларын сэбиэтэ” бииргэ түмсэн, сүбэлэһэн, “Аҕа үөрэҕэ” сонун бырайыагы толкуйдаан олоххо киллэрдилэр.

Егор Дашевскай кэпсээбитинэн, бырайыак сүрүн ис хоһоонунан аҕалара суох дьиэ кэргэҥҥэ иитиллэр уолаттарга дьиҥнээх эр киһи хайдах буолуохтаах холобурун көрдөрүү, үлэҕэ, булка, балыктааһыҥҥа, спордунан дьарыктаныыга сыһыарыы, төрөөбүт дойдубут айылҕатын харыстааһыҥҥа, саха, атын омуктар культураларын ытыктааһыҥҥа, уопсастыбаҕа сылдьыыга, чөл олоҕу тутуһууга эрдэттэн үөрэтии буолар. Ол инниттэн “Кэнчээри” киин уонна Аҕалар сэбиэттэрэ оҕолорго аналлаах араас тэрээһиннэри от ыйын 10-17 күннэригэр ыыттылар.

10-12 саастаах 10 уолу түмэн, “Кэнчээри” киин базатыгар үөрэтттилэр, кинилэргэ анаан маастар-кылаастары ыыттылар. Оҕолор куорат тэрилтэлэрин үлэлэрин билистилэр, музейга, кинотеатрга, кырдьаҕас куорат ытык-бэлиэ сирдэригэр экскурсияҕа сырыттылар.

Бастакы күн уолаттар “Бүлүү улууһун Аҕаларын сэбиэтин” кыттыылаахтарын кытта көрүстүлэр. Сэбиэт бэрэссэдээтэлэ Юрий Тутукаров саҥа бырайыак туһунан билиһиннэрдэ, сүрүн сыалларын кэпсээтэ, түмсүү атын кыттыылаахтара эр киһи хайдах буолуохтааҕын, олоххо үөскүүр түгэннэри холобурдаан быһаардылар.

Иккис күннэрин уолаттар “Полиция үлэһитин” идэтин кытта билсиигэ анаатылар. Саастарын ситэ илик оҕолор инспекцияларын старшай инспектора Светлана Петрова полиция отделыгар сырытыннаран үлэни билиһиннэрдэ, уолаттар полиция сулууспаларын үлэлэрэ уратылаахтарын көрдүлэр, начальник эбээһинэһин быстах кэмҥэ толорооччу Гаврил Кырбасов сокуоннары кэпсээтэ, полиция үлэтин билиһиннэрдэ. Бу күн уолаттар тиргэ пневматическай саанан сыал ытыалаатылар, полиция үлэһиттэрэ туттар бэстилиэттэрин, автоматтарын уо.д.а. көрдүлэр. Күн иккис аҥарыгар ГИБДД-га сылдьан хайдах үлэлииллэрин, суол быраабылаларын билистилэр.

Үһүс күннэригэр уолаттары норуот маастара, Бүлүү уустарын түмсүүтүн салайааччы Иннокентий Акимов Хомустаахха “Уус түһүлгэтигэр” сырытыннаран тимири уһаарыыны, араас тэрили, хомуһу, быһаҕы оҥорууну кэпсээтэ. Уолаттар сибэкки иһиттэрин уурар тимир олохтору оҥортоотулар, саха быһаҕын оҥорууга кытыннылар.

Төрдүс күн уолаттар Юрий Тутукаров салалтатынан экология боппуруостарын билистилэр, төрөөбүт айылҕаны харыстыырга үөрэннилэр. Виталий Афанасьев уолаттарга хайдах бултуулларын, балыктыылларын кэпсээтэ, саа араас көрүҥнэрин, манчыык, илим уо.д.а. көрдөрдө.

Бэһис күннэрин уолаттар “Быыһааччы” идэтигэр анаатылар уонна баһаарынай этэрээт үлэлиир сиригэр сылдьан туттар-быыһыыр тэриллэрин билистилэр, хас да маастар-кылаастарга үөрэннилэр.

Алтыс-сэттис күннэригэр уолаттар ыраах айаннаан сири-уоту көрөн туризмҥа үөрүйэхтэннилэр. Икки массыынанан Эйимҥэ тиийэн хоннулар, балаакка туруорарга, ас астыырга, уот отторго үөрэннилэр. Таарыйа Алыһардаах күөлүгэр балыктаатылар, кумах тукулааннары аан бастаан көрдүлэр.

Уолаттар “Аҕа үөрэҕэ” бырайыагы олус сөбүлээтилэр, сэргээн, өссө хаалыахтарын, бырайыак салҕаныаҕын баҕардылар.

Тэрийээччилэр саҥа бырайыак олоххо киирбитин, “Кэнчээри” киин уонна Бүлүү улууһун Аҕаларын сэбиэтэ уол оҕону иитиигэ сөптөх суолу тутуспуттарын бэлиэтииллэр.

Тааттаҕа эр дьон улуустааҕы сүбэлэрэ тэрилиннэ

Эр киһи аҕа быһыытынан дьиэ кэргэҥҥэ, уопсастыбаҕа ураты суолталанарыгар, киэн тутулла ааттанарыгар Таатта улууһугар эр дьон мустан мунньах тэрийдилэр. Маннык тэрээһин улууска 2014 сылтан ыытыллар.

Кулун тутар 23 күнүгэр Ытык Күөлгэ Таатта улууһун эр дьонун сугулаана ыытылынна. Сугулааны «Таатта улууһа» МО баһылыга Михаил Соров салайан ыытта. Сүрүн дакылааты улуус дьаһалтатын ыччат уонна дьиэ кэргэн политикатыгар салаатын начальнига К.Л. Егоров оҥордо.

Дакылаакка кэпсэнэринэн, билигин улуус үөрэҕириитин эйгэтигэр 120-чэ эрэ эр дьон учуутал, иитээччи үлэлиир. Үлэтэ суох эдэр дьон ахсаана сыл аайы элбээн иһэр. Арыгы мөкү дьайыыта олох хаачыстыбатын намтатар. Армияҕа барар саастаах уолаттар үгүстэрэ тиистэрин туруга мөлтөх, онкология ыарыытыгар ылларар кутталлаахтар. «Ити эрээри улууска оҕо саадыттан саҕалаан байыаннай-патриотическай иитиигэ, эти-хааны эрчийиигэ, оҕо духуобунай ис туруга күүһүрэригэр элбэх үлэ ыытыллар. Эр дьон оҥорон таһаарыыга ылсар буоллулар, бэйэ дьыалатынан дьарыктаныылара элбээтэ. Тыа хаһаайыстыбатыгар кэскиллээх үлэ ыытыллар«, — диэн эбэн эттэ Егоров.

Кэпсэтиһиигэ уонтан тахса киһи улуус, нэһилиэк сайдыытыгар эр киһи, уол оҕо оруолун үрдэтиигэ тус санааларын үллэһиннилэр. Улуустааҕы ис дьыала салаатын начальнига М.М. Егоров ааспыт сыллары кытта тэҥнээтэххэ буруйу оҥоруу үгүс өттүгэр намтаабытын, буруй улахан өттө арыгыны кытта ситимнээҕин эттэ. «Инникитин буруйу оҥорууну намтатар сыалтан оскуолаларга, дьиэ кэргэттэргэ, тэрилтэлэргэ профилактическай үлэ күүскэ ыытыллыахтаах. Тэрилтэлэргэ, нэһилиэктэргэ эр дьон, улахан кылаас уолаттара урукку курдук «табаарыстыы дьүүллэри» ыыталлара ордук дьайыылаах буолуо. Маннык тэрээһиннэри ыытыы көдьүүстээҕэ чуолкай«, — диэтэ кини.

«Дьохсоҕон нэһилиэгэ» МТ баһылыга П.Е. Захаров эр дьон предпринимательствоҕа, тыа хаһаайыстыбатыгар, тутууга чааһынай тэрилтэ тэринэн үлэлииллэригэр ыҥырда. Баайаҕа нэһилиэгин ыччата итинник үлэҕэ күүскэ соруммуттарын, бастакы хардыы саҕаламмытын кэрэхсээбитин иһитиннэрдэ.

Баайаҕаттан оҕо саадын сэбиэдиссэйэ К.К. Мандаров «Баай аҕалар» түмсүү тэриллэн, ыччаттар 150 тыһ.солк. харчыны хомуйан, 4 саҥа дьыала тэринээччилэргэ көмө быһыытынан биэрбиттэрин иһитиннэрдэ. Харчыны биэрии анал куонкурсунан барарынан, баҕалаах барыта ылбатын, нэһилиэк сайдыытыгар туһуламмыт эрэ бырайыактаахтарга бэриллэрин быһаарда. Ити суумманы кинилэр аны икки сылынан түмсүүгэ төннөрөллөрүн, салгыы атыттарга баран иһэрин кэпсээбитин дьон сэҥээрэ иһиттэ. Бу бырайыак ыччат тыа сиригэр олохсуйарыгар туһуламмыт.

«Уус Амма нэһилиэгэ» МТ сүрүннүүр специалиһа Г.Г. Нестеров оҕону кыра сааһыттан үлэнэн, хамсаныылаах тэрээһиннэринэн, айылҕалыын алтыһыннаран иитэр ордугун бэлиэтээн эттэ.

Уолба орто оскуолатын директора С.Р. Рахлеев оскуолаҕа өр сылларга уол оҕону байыаннай-спортивнай оонньууларынан иитии үтүө түмүктэрдээҕин, телефону үөрэх кэмигэр туһаммат буолууга үлэлэһэн эрэллэрин иһитиннэрдэ.

Хаандыгатааҕы ГГТ Харбалаахтааҕы салаатын директора орто оскуоланы кытта алтыһыннарыллыбыт 6-11 кылаастарга идэҕэ туһуламмыт үөрэхтээһин тэриллэн эрэрин кэпсээтэ. Оҕо тус бырагыраамманан үөрэниэхтээҕин, оскуоланы бүтэриитигэр идэ ылбытын туоһулуур докумуоннаах тахсыахтааҕын сэргии иһиттибит. Ытык Күөл 1№-дээх орто оскуолатын физкультураҕа учуутала Е.Е.Харайданов бу оскуолаҕа аҕата суох уол оҕо элбэҕинэн илии үлэтигэр, айылҕаҕа сылдьыыга, араас тэрээһиннэргэ кытыннарыыга үлэ үгүстүк ыытылларын иһитиннэрэн туран, инникитин оскуола аайы үлэ-сынньалаҥ лааҕырдарын улуус салалтатынан тэрийэргэ этии киллэрдэ.

«Тааттаавтодор» ХЭТ тракториһа, гиирэ спордун тэрийээччи, Таатыныскай нэһилиэк аҕаларын сүбэтин салайааччыта И.И.Бояров аҕа, эр киһи оҕо саадыттан саҕалаан араас үлэлэргэ кыттара туһалааҕын, гиирэ спорда доруобуйа харыстабылыгар, эти-хааны бөҕөргөтүүгэ олус наадалааҕын бэлиэтээтэ. Инникитин сугулаан кэнниттэн ылыллыбыт соруктар хайаан да толоруллалларыгар эттэ.

«Игидэй нэһилиэгэ» МТ спортинструктора П.П. Ермолаев эр дьон, ыччат мантан салгыы хайа да тэрээһиҥҥэ түмсүүлээхтик, ылыммыт соруктары толорууга ылсыһарыгар, утумнаахтык үлэлииргэ ыҥырда. Оскуола улахан кылаастарын уолаттарын араас сокуоннарынан бултан, айылҕаттан тэйитии кэлин бултаабат, айылҕаҕа сатаан сылдьыбат дьон элбииригэр тиэрдэн эрэринэн, сааскы, күһүҥҥү куска сырытыннарыыны, суолтатыгар да буоллар күһүн куобахха хаамтарыыны тэрийэр наадалааҕын эттэ.

Улуус спортка кэмитиэтин начальнига Г.Г. Вырдылин алын сүһүөх кылаастарга улахан күрэхтэһиилэр ыытыллыбат буолбуттарынан, бу сүһүөххэ күрэхтэһиилэри тэрийэргэ, аҕалар уолаттарынаан спортсаалаларга сылдьыылара элбииригэр, уолаттары илии үлэтинэн, булдунан иитиини утумнаахтык ыытарга, аҕалар, эр дьон сүбэлэрэ нэһилиэктэргэ, тэрилтэлэргэ күүскэ үлэлииллэрэ наадатын, салайааччылар бэйэлэринэн спортивнай күрэхтэһиилэргэ кыттыылара элбииригэр эттэ.

Баайаҕа орто оскуолатын историяҕа учууталынан уһуннук үлэлээбит, педүлэ бэтэрээнэ Г.Г. Неустроев оскуолаларга, оҕо саадтарыгар эр дьон үлэлииллэригэр үлэ барарыгар, дьоҕурдаах, сатабыллаах педагог буолбатах да эр дьон араас куруһуоктары, тэрээһиннэри анал бырагыраамманан ыыталларыгар этии киллэрдэ.

ОДьКХ Уолбатааҕы учаастагын сүрүн үлэһитэ А.А. Винокуров, «Октябрьскай нэһилиэк» МТ баһылыга М.Г. Аржаков уол оҕо дьиэ кэргэнтэн иитиллэрин, оҕо саадыгар, оскуолаҕа дуу иитии үлэтин ыытыы салайааччыттан улахан тутулуктааҕын санаттылар. Уолу, кыыһы аналларынан иитии-үөрэтии анал бырагыраамманан ыытыллыахтааҕын эттилэр.

Эдэр аҕа, араас дэгиттэр дьоҕурдаах Э.Г. Вырдылин-Бырдыкы Уус аҕа киһи арыгыттан букатыннаахтык аккаастанарыгар, бэйэтин үлэҕэ, олоххо үтүө сыһыаныгар холобур буоларыгар эттэ. Аҕа уонна уол бииргэ сылдьар дьарыктаах буолалларыгар, оччоҕо эрэ уол аҕатыттан элбэх үчүгэйгэ үөрэниэн сөбүн тоһоҕолоон эттэ.

Нэһилиэнньэ социальнай көмүскэллээх буолуутун салалтатын начальнига М.П. Тарасов хайа да тэрилтэҕэ, салалта хайа да таһымыгар аҕа саастаахтар тэҥҥэ үлэлиир эрэ буоллахтарына, ыччаттар кинилэртэн холобур ылыахтаахтарын санатта. Онон, улууска «Кырдьаҕастар Сүбэлэрэ» баар буоларыгар эттэ.

Сугулаан түмүгэр резолюция ылылынна, эр дьон улуустааҕы сүбэлэрэ 20-чэ киһиттэн састааптаах, Михаил Петрович Тарасов бэрэссэдээтэллээх талылынна, бастыҥ үлэлээхтэргэ улуус салалтатын грамоталара, махтал суруктара туттарылыннылар. Сүбэ бастакы мунньаҕа кулун тутар 30 күнүгэр тэрээһин боппуруостары көрүөҕэ, үлэ былаанын ылыныа уонна СӨ аҕаларын 2-с сийиэһин дэлэгээттэрэ талыллыахтара.

Хаҥаластааҕы «Уол оҕо – олоҥхо бухатыыра» үбүлүөйдээх фестивальга 122 оҕо кытынна

Покровскай куорат «Арчы» дьиэтигэр «Уол оҕо – олоҥхо бухатыыра» улуустааҕы фольклорнай фестиваль үтүө үгэскэ кубулуйан, 10 төгүлүн бэрт тэрээһиннээхтик ааста. Бырайыак ааптара Гаврильева Мотрена Егоровна.

Фестиваль алгыһынан саҕаланна, алгыһы толордо «Арчы» дьиэтин сэбиэдиссэйэ Лидия Харитонова. Улууспут депутаттарын, Олоҥхо Ассосияциятын, бэрэссэдээтэлэ Протодьяконов Борис Петрович тэрээһин кыттыылаахтарын уон сыллаах үбүлүөйүнэн эҕэрдэлээтэ. Улуус култууратын салалтатын аатыттан бары уһуйааччыларга махтал тылын эттэ уонна бу фестиваль түмүгүнэн тахсыбыт дьоһун кинигэлэрин туттарда.

Уол оҕону олоҥхо эйгэтигэр сыһыарыы, дьоҕурун сайыннарыы, кини оруолун үрдүктүк тутуу, үтүөҕэ-сырдыкка иитии, уһуйуу туһунан санаалар, этиилэр, уопут атастаһыыта ыытылынна. Үс хайысханан ааста: олоҥхону олоҕурбут ньыманан биирдиилээн, бөлөҕүнэн толоруу, олоҥхону чинчийии, олоҥхо тиэмэтигэр уруһуй.

Саастарынан үс бөлөххө араҕыста:
1 бөлөх – 6 сааһыгар диэри;
2 бөлөх – 7-12 саастаахтар;
2 бөлөх – 13-18 саастаахтар;

Дьыссаат иитиллээчилэрин оҕолоругар уруһуйга бириистээх миэстэҕэ тигистилэр:
1 миэстэ – Гермогенова Аня, «Сардаана», салайааччылара Пермякова Ольга Васильевна, Местникова Наталья Ивановна.
2 миэстэ – Филиппова Сандаара, «Сардаана», салайааччылара Ильина Мираида Климентовна, Ушницкая Ася Егоровна.
3 миэстэ – Николаев Максим, салайааччыта Борисова Т.А.

Уруһуйга биһирэннилэр:
Николаева Аина, Хоточчу дьыссаат иитиллээччитэ, салайааччылара Егорова Екатерина Михайловна, Старостина Олеся Михайловна, Семенов Сережа Хачыкаат «Колосок» иитиллээччитэ, салайааччыта Тырылгин Николай Егорович, Прокопьева Уля, «Сардаана», салайааччыта Ильина Мираида Климентовна, Павлов Глеб, «Сардаана», салайааччылара Егорова А.В., Скрыбыкина М.М.

8-13 саастарыгар диэри оҕолорго:
Өктөм оскуолатын үөрэнээччилэрэ.

Олоҥхону олоҕурбут ньыманан толорууга:
6-гар диэри саастаахтарга: Өктөм нэһилиэгиттэн үс эрэ саастаах Сарыал Захаров «Дьурулуйар Ньургун Боотур” олоҥхоттон толорон «Сыл бастыҥ саҕалааччыта» анал аат иҥэрилиннэ, салайааччыта эбэтэ Фомина Федора Ивановна.
1 – 2 миэстэ Улахан-Аан «Кыымчаан» дьыссаат иитиллээччилэрэ Богдан Слепцов,
Айгыл Алексеев салайааччылара Олесова Айна Михайловна.

7-12 саастарыгар диэри оҕолорго:
1 миэстэ Улахан-Аан орто оскуолатын 2-с кылааһын үөрэнээччитэ Дархан Тихонов салайааччыта Трофимова Валентина Михайловна.
2 миэстэ Өктөм орто оскуолатын 1-кы кылааһын үөрэнээччитэ Айсен Михайлов салайааччыта Трофимова Светлана Николаевна.

Олоҥхону бөлөҕүнэн толорууга:

Оҕо саадын иитиллээччилэрэ:
1 миэстэ Ой нэһилиэгин «Чуораанчык» оҕо саада салайааччылара Матвеева Оксана Прокопьевна.

7-12 саастарыгар диэри оҕолорго:
1 миэстэ «Саһарҕа» бөлөҕө Күөрдэм оскуолатын 4 кылааһын үөрэнээччилэрэ, салайааччылара Ефремова Февронья Ивановна, Гермогенова Валентина Герасимовна.

13-18 саастарыгар диэри оҕолорго:
Чыпчаал бирииһи «Бэргэн» бөлөҕө Петр Игнатьев “Кулан Кыыртай бухатыыр ” олоҥхотуттан быһа тардан тойугунан толордулар Тиит-Эбэ оскуолатын 7 кылааһын үөрэнээччилэрэ, салайааччылара Прокопьева Софья Ивановна.

Олоҥхону чинчийэр үлэҕэ:
“Саха киһитэ сылгыга сыһыанын олоҥхолортон кэтээн көрүү” тематын бэрт сиһилии кэпсээн, ыллаан-туойан арыйда Улахан-Аан орто оскуолатын 2-с кылааһын үөрэнээччитэ Дархан Тихонов, салайааччыта Трофимова Валентина Михайловна.
Чинчийэр үлэ хайысхатыгар оскуолалар үлэ ыыппатахтара хомолтолоох.

Бастыҥ уһуйааччы аатын ылла:
Тиит-Эбэ оскуолатын «Бэргэн» бөлөҕүн салайааччыта Прокопьева Софья Ивановна.

Дьүүллүүр сүбэҕэ үлэлээтилэр: Гаврильева М.Е., Харитонова Л.В., Ющенко Д.Д, Никитин Н.И., Федорова Н.Н.

Кыайыылаахтарга уонна биһирэбил ылбыт оҕолорго улуус култууратын аатыттан дипломнары, махтал, туоһу суруктары, вымпеллары, значоктары туттарылынна.

Уон сыллаах үлэ түмүгүн кэтээн көрдөххө, бу бырайыак уол оҕо тус бэйэтигэр эрэллээх буолуутугар, дьоҕура арылларыгар туһалааҕа билиннэ. Холобур, Тиит-Арыыттан Максим Аммосов республикатааҕы М.К. Аммосовка аналлаах үбүлүөйдээх ыһыахха олоҥхону толорууга бастаан, чулуу олоҥхоһуттар ахсаанарыгар киирбитэ, Саха өрөспүүбүлүкэтин Гранынан наҕараадаламмыта, Кондратьев Максим Эргис ааҕыылара регионнааҕы научнай-практическай конференцияҕа 2-с миэстэни ылары ситиспитэ, Прокопьев Данил 2014 сыллаахха Хаҥаласка ыытыллыбыт 8-с өрөспүүбүлүкэтээҕи Олоҥхо ыһыаҕар кыайыы өрөгөйүн билэн, Париж куоракка барар путевканан наҕараадаламмыта, Адамов Миша Дьокуускайдааҕы култуура коллеһын норуот айымньытын салаатыгар туттарсан киирбитэ, билигин армияҕа сулууспалыы сылдьар.

Бу тэрээһини ыытыыны өрүү өйүүр Хаҥалас улууһун эбии үөрэхтээһин киинин үлэһиттэригэр, салайааччы Леонтьева Марина Иннокентьевнаҕа тус бэйэтигэр барҕа махталбытын тиэрдэбит. Инникитин сүдү олоҥхобутун, олоҥхоһуттарбытын үйэтитиигэ үлэни күүскэ ыытан, олоҥхобутун, түөлбэ олоҥхоһуттарын ааттата туруоҕа.